ريما بانفعال: إوعى تفتكر إني هعدي اللي حصل امبارح ده على خير، صدقني هحاسبك، بس مش دلوقتي.
أحمد ببرود: تمام.
ريما بغيظ: أوووف، ده أنت ثقيل أووي وبارد.
أحمد ابتسم ببرود وفتحلها الباب، فركبت ريما وهي بتبرطم، وركب أحمد هو كمان مكانه وساق، وفي الطريق كانت بتتكلم ريما في الفون لحد ما انتبه أحمد لكلامها.
ريما بقلق: ومين قالك يا ملك إني مش خايفة؟ أنا مرعوبة، ده أنتي مشوفتيش نظراته ليا كانت عاملة ازاي، بس للأسف أنا كنت مجبرة اتحملها، ولا كله كوم ولما قالهالي صراحة كدة في وشي، وقتها كان هاين عليا أديله بالقلم على وشه، الحيوان ده، بس للأسف مقدرتش، إيه أنتي كنتي عاوزاني أعمل كدة؟ طب وبابي، أنتي عارفة إن فعلاً حالته مش قد كدة، وأنا خايفة عليه، ده لو عرف كان هيقلب الدنيا، أنا متأكدة، بس أنا خايفة عليه من الحيوان ده، بصي هقفل عشان وصلت، وهكلمك أما أروح عشان أشوف هعمل إيه في عشا بكره.
ده سلام.
قفلت ريما بحزن وسرحت وهي باصة للطريق وبتفكر هتعمل إيه.
أحمد بجدية: احم، حضرتك هتروحي مكان تاني انهارده؟
ريما بتكشيرة: أنت عندك معاد ولا إيه؟ لتكون عاوز سلفة من أول يومين شغل.
أحمد بضيق: أنا سألت حضرتك سؤال، فياريت تقولي إجابته من غير سخرية.
ريما ببرود: تمام، احتمال أخرج، يعني مفيش مرواح في حتة، تمام.
أحمد بتنهيدة: تمام، مفيش مشكلة، اتفضلي، وصلنا.
ريما كانت هتنزل، بس كشرت لما أحمد تليفونه رن ورد وهو في العربية، فكانت هتزعقله، بس ملامحها اتحولت للقلق لما لقته بيتكلم بلهفة: خير يا طنط كوثر؟ طمنيني، هي تعبت تاني ولا إيه؟ إيه؟ طب أنا جاي حالاً، مع السلامة.
ريما بتردد: هو في حاجة ولا إيه؟
أحمد بسرعة: بعد إذنك، أنا لازم أمشي، والدتي تعبانة ومحتجاني جمبها.
كان متوقع أحمد إنها تعند، لكنه اتفاجأ بيها بتقوله بقلق: تمام، يلا بينا بسرعة.
أحمد باستفهام: يلا ازاي؟ هو حضرتك هتيجي معايا؟
ريما بكدب: آه، عشان أعرف يعني بتكدب وبتحور ولا فعلاً مامتك تعبانة.
أحمد بضيق: تمام.
وساق أحمد بسرعة على بيته، وكانت وقتها ريما مستغربة حالها أوي، وإنها كدبت على أحمد وقالتله كدة، وهي في الحقيقة عندها فضول تشوف مامته وحياتهم عاملة ازاي، وخصوصاً إن أحمد واضح عليه إنه بيحبها أوي ومهتم بيها.
كانت واقفة ريما من بعيد وهي شايفة أحمد وأمه وهي بطبطب عليه، وقتها دموعها نزلت بحزن لأنها افتكرت أمها اللي مشافتهاش ومتعرفش حتي شكلها إيه ولا حنيتها عاملة ازاي.
أحمد بلهفة: بقي كدة يا أمي تخضيني عليكي؟ ده أنا مأكد عليكي الصبح تاخدي العلاج.
زينب بابتسامة: يا حبيبي أنا كويسة، مفيش حاجة، هي بس خالتك صابرين بتقلق بسرعة، معرفش ليه رغم إني مأكدة عليها إنها متكلمكش.
صابرين بصدمة: يا ولية بتكدبي وأنتي في السن ده؟ ده أنتي مكنتيش قادرة تاخدي نفسك وهتفرفري بدري.
زينب بضحك: يخيبك يا صابرين، ضحكتيني، الحمد لله أنا كويسة دلوقتي بعد ما أخدت العلاج، وبعدين ما أنت عارف إن الحل في إيدك يا أحمد، وياما قولتلك اتجوز بقي عشان تجيبلي واحدة ترعاني.
أحمد ابتسم بتلقائية: أنا عارف أنتي عاوزة تدبسيني، أنا اتجوز وبعدين تقوليلي شيل نفسك بقي أنت ومراتك ومش عاوزة حد يعملي حاجة، بس مش هنولهالك يا زوبة.
زينب بانتباه: يا ربي، أنا نسيت أسألك مين دي؟ اتفضلي يا بنتي، معلش متأخذنيش مرحبتش بيكي.
ريما بتوتر: شكراً يا طنط، والف سلامة علي حضرتك.
أحمد بجدية: دي آنسة ريما يا ماما، صاحبة الشغل، إنسانة كويسة أوي، ولما جاتلي المكالمة من خالتي صابرين وعرفت إنك تعبانة صممت تيجي معايا تطمن عليكي.
زينب بحب: تسلميلي يا بنتي، ربنا يسعدك ويكرمك يارب، والله مش عارفة أقولك إيه، أنتي مفيش زيك دلوقتي.
ريما بإحراج: علي إيه يا طنط؟ أنا معملتش حاجة، استأذنكم أنا بقي، والف سلامة علي مرة تانية.
زينب بلهفة: ياخبر، لا طبعاً أنتي هتتغدي معانا، إيه هتكسفيني؟ ده أنا زي أمك يعني.
ريما بهدوء: العفو يا طنط، بس أنا مش عاوزة أتعبك.
زينب بابتسامة: ولا تعب ولا حاجة، دي خالتك صابرين هي اللي هتعمل الأكل، أنتي اقعدي ارتاحي، واهو نتعرف عليكي أكتر.
أحمد بص لامه بغيظ لأنه عارف هي تقصد إيه، وفهم نظراتها لريما، وسابهم وقتها ودخل أوضته، وكانت متابعاه ريما بإحراج.
عدي اليوم، وكانت ريما سعيدة أوي بالوقت اللي قضته مع عيلة أحمد، فكانت نازلة معاه عالسلم وهي بتتكلم بتلقائية: بجد عيلتك جميلة أوي يا أحمد، أنا كنت مبسوطة أوي بالوقت اللي قضته هنا.
أحمد بضيق: أعتقد كدة اتأكدتي إني مبمثلش عليكي، إن أمي تعبانة عشان أسيب الشغل، ولا عشان أطلب سلفة.
اتوترت ريما واتحرجت أوي، فاتكعبلت وكانت هتقع، فشهقت بخوف، بس إيد أحمد كانت أسرع ولحقها، فكانت قريبة منه أوي، وفضلوا يبصوا لبعض هما الاتنين، لحد ما أحمد بعد بهدوء، وريما كانت محرجة أوي.
ريما بكسوف: أنا آسفة، كنت هقع، مخدتش بالي.
أحمد بجمود: غريبة، افتكرتك بتعتذري على سوء ظنك بيا.
ريما بتهرب: أنا مستعجلة، ياريت توديني بسرعة الفيلا عشان عندي تحضيرات لميتنج مهم.
أحمد افتكر كلام ريما مع صحبتها في الفون، وكان عاوز يسألها، بس سكت ومردش عليها غير بـ: تمام يا فندم. وطول الطريق كانت ريما بتفتكر الوقت اللي قضته مع أم أحمد، وكانت فرحانة أوي، واتمنت لو تقدر تروح تاني هناك وتعيش الجو الأسري ده، انتبهت ريما لصوت أحمد وهو بيوقف العربية قدام الفيلا.
أحمد بجدية: وصلنا يا فندم، اتفضلي.
ريما بتردد: علي فكرة أنا آسفة لأنك فهمت إني كنت شاكة فيك، بس الحقيقة إني كنت عاوزة أشوف حياتكم البسيطة، وسعيدة إني اتعرفت على مامتك، وقد إيه أنا كان نفسي أحس الإحساس ده، ربنا يخليهالك.
قالت ريما كلامها ونزلت بسرعة من العربية، وسابت أحمد بيبص لأثرها وهو سرحان، وعلي وشه ابتسامة بسيطة.
تاني يوم ريما مخرجتش خالص طول النهار، وكانت مترددة تروح عزومة عز بليل ولا لا، وخصوصاً إنها في بيته، وهي متأكدة إنها لو مراحتش هو هيضايق ويحطها في دماغه، واحتمال يقفل المصانع كمان بتاعة والدها، وده اللي فهمته من تلميحاته ليه ومكالمته الأخيرة وهو بيقولها عالمكان. كانت واقفة ريما قدام المراية وهي لابسة فستان سواريه، وكانت قمر أوي، بس كانت حزينة وخايفة، لأول مرة متبقاش عارفة تعمل إيه، رغم إنها متأكدة إنها باللي هتعمله ده غلط، بس كانت بتفكر إنها لازم تحاول تقنع عز بالشراكة. أخدت شنطتها ونزلت، ووقتها كان قاعد شريف بيشرب قهوته: ماشاء الله، إيه الجمال ده؟ أنتي عندك فرح انهاردة ولا إيه؟
ريما بكدب: آه يا بابي، فرح صديقة ليا، ادعيلي بقي أعرف اقعد مكاني ومهربش زي كل مرة.
شريف بابتسامة: هدعيلك يجيلك عريس، وأهم حاجة توافقي عليه، أنا نفسي أفرح بيكي بقي.
ريما بتوتر: إن شاء الله يا حبيبي، عاوز حاجة؟
شريف بحب: سلامتك يا روحي، أحمد مستنيكي برة طبعاً، مش كدة؟
ريما بتأكيد: آه يا بابا، يلا بعد إذنك.
خرجت ريما وهي بتقدم رجل وتأخر رجل، وفي نفس الوقت أحمد كان مثبت عنيه عليها، وهي بتقرب منه، وكان بيبصلها بنظرة غامضة وإعجاب واضح، وده وتر ريما أوي وخلاها تبص في الأرض بخجل لحد ما وقفت قدامه.
أحمد بهدوء وهو بيفتح باب العربية: اتفضلي.
ريما ركبت بهدوء، وطول الطريق وهي متوترة أوي ومش عارفة تعمل إيه، قلقها من مقابلة عز خلاها تنسي توترها من أحمد، كانت بتحرك رجليها بتوتر وهي باصة بعيد، وكان أحمد ملاحظ ده.
أحمد بهدوء: آنسة ريما، حضرتك كويسة؟
ريما بحزن: لا، أقصد، آه، آه كويسة، بس قلقانة شوية.
أحمد بتردد: ممكن أعرف من إيه؟
ريما بصوت مخنوق: من المشوار اللي أنا رايحاه، نفسي يعدي على خير.
أحمد بقلق: وإيه اللي مش هيخليه يعدي على خير؟
ريما بكدب: لا مفيش، أنا بس مش بحب العزومات، صحيح مامتك عاملة إيه دلوقتي؟ مش أحسن؟
أحمد عرف إنها بتتهرب منه، فرد بهدوء: آه الحمد لله كويسة، وبتسلم عليكي أوي، وموصياني أبلغك إنك لازم تزوريها مرة تانية.
