ريما بابتسامة رقيقة: أكيد هزورها مرة تانية، بلغ سلامي ليها لو سمحت، إيه ده؟ احنا وصلنا بسرعة ليه كدة؟
أحمد بهدوء: عشان كنا بنتكلم، احم، تحبي أجيلك معاكي؟
ريما بتردد: لا شكراً، خليك أنت هنا، أنا مش هتأخر أصلاً، شوية وهخرج.
أخدت ريما نفس طويل ونزلت من العربية، وكان واقف مستنيها عز على باب الفيلا، فقربت منه ريما، وهو مد إيديه ليها وهو بيبصلها بنظرات إعجاب صريحة، كانت بالنسبة لريما رصاص، وكل ده تحت نظرات أحمد اللي كان واقف قدام عربيته وشايفهم وهما داخلين سوا الفيلا، واتعصب من لما شاف نظرات عز لريما قبل ما ياخدها ويدخلو فيلته.
كان بيتكلم عز وهو واقف قدام ريما وبيبصلها بإعجاب، لكنها كانت بتتلفت حواليها وبتشوف المكان بقلق.
ريما بتشجيع: وهقلق ليه؟ أنا بس بشوف المكان، أصلي مش بحب اقعد في مكان معرفوش، ياريت بقي ندخل في الموضوع علطول عشان متأخرش.
عز بابتسامة: ومستعجلة ليه كدة؟ لسة هنتعشي سوا ونتكلم براحتنا، مش لازم نعرف بعض أكتر.
ريما بجدية: بس أنا مش بعرف أكل حاجة برة البيت يا عز بيه، ثانياً أنا قبلت عزومتك عشان بس تعرف إني جدية في موضوع الشراكة.
عز بغرور: تؤ تؤ، أنتي قبلتي عزومتي يا ريما عشان عارفة ومتأكدة إنك لو مكنتيش جيتي كان هيبقالي تصرف تاني، زي بالظبط ما أنتي عارفة إنك لو مطاوعتنيش هتخسري كل حاجة، أولهم والدك.
ريما بغضب: أفهم من كدة إن الموضوع مش موضوع عشا بس، أنا كنت عارفة إنك غير محترم، بس قولت يمكن.
عز ببرود: أيوة هو بالظبط كدة زي ما قولتي، بس زودي عليهم إنك كنتي عارفة إن مجيتك هنا هي اللي هتنقذ أبوكي.
ريما باحتقار وهي بترفع إيديها عشان تردعه: أنت إنسان غير محترم، وأنا ميشرفنيش إني أشتغل مع واحد زيك.
عز مسك إيديها قبل ما تردعه، وقالها بهمس بارد وهو بيقرب منها: لا هتشتغلي يا ريما، ومش بس كدة، أنتي هتيجي هنا تاني وتالت ورابع بإرادتك، ها.
ريما دموعها نزلت وهي باصة لعز، بس وقتها لقت إيد أحمد بتبعدها عن عز وبيخبيها ورا ضهره، وهو بيتكلم بغضب: أنت عارف لو إيدك فكرت تلمسها تاني أنا هعمل فيك إيه؟
عز بغضب: أنت مين وبأي حق تدخل هنا؟ ودخلت ازاي أصلاً؟ انطق.
أحمد بسخرية: لتكون مفكر البهايم اللي أنت حاطتها برة دي هتمنعني؟ غلطان، ابقي روح شوفهم وهما مرمين في الأرض، وأنت تعرف أنا أقدر أعمل إيه، وهي كلمة لو فكرت تتعرض لريما تاني أنا هخليك تتمني أسوأ حاجة، فانساها، أنت فاهم.
عز بانفعال: وأنت فاكر إني هسيبك تخرج بيها من هنا؟ تبقي غبي.
ريما كانت متبتة في هدوم أحمد وهي مستخبية وراه وبتعيط بانهيار وخوف، زادو لما أحمد همس ليها بجدية: روحي العربية واستنيني هناك، وإوعي تخرجي منه، أنتي فاهمة.
ريما بخوف: وأنت؟ أنا مش هخرج غير وأنت معايا.
أحمد بزعيق: قولتلك روحي، يلا.
اتنفضت ريما وجريت على برة الفيلا، ووقتها أحمد بص لعز وابتسم بسخرية وقرب منه، وبدأوا يتعاملوا بقوة، بس أحمد كان أقوي وأسرع من عز، وحرفياً أوقفه، وبعدين مسكه من هدومه وقاله بغضب: من انهاردة تنسي إنك شوفت ريما أو تعرفها، ولو فكرت صدقني هخليك تندم إنك عملت كدة.
قال أحمد كلامه ومشي بسرعة وركب العربية، وريما وقتها اتخضت أما شافت شكله المتبهدل، وكانت هتتكلم، بس أحمد ساق بسرعة من غير ما يديها فرصة.
عدي كام يوم وريما مش بتخرج من الفيلا نهائي، كانت بتحاول تتخطي اللي حصل، وكان لازم إنها تعرف أبوها، عشان كدة راحت ليه مكتبه.
ريما بهدوء: بابا، أنا كنت عاوزة أقولك علي حاجة حصلت.
شريف بجدية: عارف اللي حصل كله، أحمد حكالي، بس كنت مستنيكي لما أنتي اللي تحكيلي يا ريما، ليه عملتي كدة؟ للدرجادي شايفة أبوكي عيل صغير؟
ريما بدموع: بابا أنا آسفة، بس المصانع بتنهار، وأنا كان لازم أتصرف.
شريف بانفعال: وأنتي شايفة إن المصانع أهم منك؟ كنت هعمل إيه بالمصانع والفلوس لما أخسر بنتي الوحيدة؟ مفكرتيش في كدة؟ أنتي غلطتي يا ريما، والمفروض إنك أعقل من كدة، أنا بحمد ربنا إن أحمد اتدخل في الوقت المناسب، مين عالم كان هيحصل إيه، ولا كان عمل فيكي إيه الحيوان ده.
ريما بانهيار: أنا آسفة.
شريف بحنية وهو: خلاص يا حبيبتي، بس المرادي ربنا سترها، المرة الجاية مين عالم هيحصل إيه، ياريت متتصرفيش من دماغك، وأنا مش صغير عشان مش هعرف أحكم شغلي، ولو حكمت أوي هقفل المصانع دي، مش عاوزها، بس الأهم عندي أنتي وإنك تكوني بخير.
ابتسمت ريما من بين دموعها، وهي وأبوها، فاستأذنت أباها وخرجت ليه، وشافته واقف سرحان وهو ساند عالعربية، فقربت منه بتردد.
ريما بتردد: شكراً يا أحمد.
أحمد بجمود: علي إيه؟ ده واجبي.
ريما بهدوء: لا مش واجبك، أنت شغلك تسوق مش تنقذ حياة أي حد، بس أنت أنقذتني منه، وأنا حقيقي ممتنة ليك.
أحمد بضيق: تمام، تؤمري بأي خدمة تانية.
ريما باستغراب: هو أنت مضايق مني؟ أنا زعتلك في حاجة؟
أحمد بانفعال: لا خالص، هضايق منك ليه؟ عشان غبية مثلاً؟ رايحة لوحد بيته وفاكرة إن نيته هتبقي خير؟ أنتي للدرجادي ساذجة؟ فاكرة إن الكون كله ماشي ببراءتك؟ تعرفي كان ممكن يحصل إيه لو مكنتش معاكي؟ أنتي ازاي كدة بجد؟ مش فاهم.
