ريما بغضب: وأنت مين قالك إني ممكن استسلم ليك؟ ولا أنت فاكرني شبه الژبالة اللي أنت تعرفهم؟
عز بثقة: أنتي غيرهم، أنا متأكد يا ريما، وده اللي عاجبني فيكي، بس كل حاجة وليها طريقة المعاملة بيها، وأنا بقي عارف قيمتك كويس، زي ما أنا عارف إنك مش غبية وهتفكري كويس في مصلحة مصانع والدك اللي بدأت تنهار، وفي لحظة ممكن يعلن إفلاسه، أنا لو منك أفكر كويس وأقبل بالعشا، عموماً هستناكي، وأنا متأكد إنك هتيجي يا ريما.
ريما بصت لعز بغضب وسابته ومشيت، بس من جواها متأكدة إنه عنده حق في كلمة قالها، وإنها غصب عنها لازم تروحله عشان تنقذ أبوها من الإفلاس، وقتها حست ريما بخنقة ودموعها كانت محبوسة جوا عينها، وخرجت من الشركة بسرعة، وركبت عربيتها، وأحمد ركب هو كمان بتلقائية، بس كان مستغرب لأنه لاحظ شكل ريما أول ما خرجت من الشركة.
ريما بخنقة: عالبيت لو سمحت.
أحمد بطاعة: حاضر يا فندم، زي ما تحبي.
مشي أحمد وطول الطريق كانت ريما بتمسح دموعها كل ما تنزل، وكان متابعها أحمد في المراية من وقت للتاني، ونفسه يسألها إيه اللي حصل جوا زعلها أوي كدة، لكنه فضل الصمت ومتكلمش لحد ما وصلو الفيلا.
ريما بدموع: تقدر تروح بيتك، أنا مش هخرج تاني انهارده.
قالت ريما كلامها ودخلت الفيلا، وكان متابعها أحمد بقلق.
تاني يوم كانت قاعدة ريما عالسفرة، وباين عليها الحزن والشرود.
شريف بقلق: مالك يا ريما؟ في حاجة حصلت يا حبيبتي؟
ريما بابتسامة: لا يا حبيبي متقلقش، مفيش حاجة، كله تمام.
شريف بقلق: مفيش إزاي؟ أنتي باين عليكي إنك مش في مودك وسرحانة، وحتي مبتاكليش، في إيه يا حبيبتي طمنيني، هو في حاجة حصلت في معادك مع اللي اسمه عز ده؟
ريما بتوتر: لا يا حبيبي، بالعكس الراجل كان زوق جداً، وطلب كمان نعمل عقد شراكة عشان إنتاج مصانعنا لشركته، وأنا شايفة إنها فرصة كويسة جداً.
شريف بهدوء: هي حاجة كويسة، بس الراجل ده أنا مش مرتاحله يا بنتي، ورغم إننا محتاجنله، بس لازم ناخد حذرنا.
ريما بابتسامة متوترة: طبعاً يا حبيبي، متشغلش أنت بالك، وأنا هعمل كدة طبعاً، وبرضه هراجع كل حاجة، يلا هقوم أنا عشان عندي ميتنج مهم، صحيح أنا مش عاوزة السواق ده يا بابي، لو سمحت ياريت تمشيه.
شريف بتلقائية: كان بودي أقولك ماشي يا ريما، بس للأسف شكلي هيبقي وحش قدام صديقي، يرضيكي؟ عموماً اصبري عليه، وبعدين نشوف الموضوع ده.
ريما بغيظ: تمام يا بابي، أنا ماشية بعد إذنك.
مشيت ريما، وأول ما خرجت من باب الفيلا شافت أحمد كان مستنيها، وعلي وشه ابتسامة خبيثة، لأنه عارف إنها كلمت أبوها عشان تمشيه، وقالها
