أحمد بجدية: أيوة يا فندم، أنا أحمد اللي كلمك عني مراد بيه.
شريف بجدية: أنا عمري ما وثقت في حد معرفوش، بس مراد شكر فيك كتير وفي والدك، فاتمنى إنك تكون قد الثقة.
أحمد بابتسامة: إن شاء الله أكون عند حسن ظن حضرتك يا فندم، وعلي فكرة أنا كنت مع مراد بيه قبل ما يسافر، كنت السواق الشخصي بتاعه، فالحمد لله كنت قد ثقته فيا.
شريف بتلقائية: طيب تمام أوي، أنت هتبدأ من انهاردة، بس مش هتكون معايا أنا، أنت هتكون سواق ريما بنتي، عاوزك مش بس سواق يا أحمد يابني، أنا عاوزك تاخد بالك منها، هي في أمانتك.
أحمد بتردد: تمام يا فندم إن شاء الله.
شريف بتردد: وأحب أقولك إنها عصبية شوية عشان بس تبقي عارف، يعني بس عموماً لو في أي حاجة ياريت ترجعلي الأول.
أحمد حرك راسه بموافقة، وفهم من كلام شريف إنه مش أول سواق، وإن واضح إن بنته ريما دي من النوع اللي مش بيكمل معاها حد، فاتنهد بضيق، وده لأنه مكنش عاوز يشتغل مع أي ست أصلاً.
انتبه أحمد لصوت شريف اللي كان بيتكلم بفرحة وريما بتقرب منه، فكان متابعها بعنيه، وفهم من كلامهم إنها دي ريما بنته اللي هيبقي السواق بتاعها.
شريف بابتسامة: أقدملك يا ستي أحمد السواق الجديد، شاب ممتاز، يارب بس يصمد معاكي.
ريما بغرور من غير ما تبص لأحمد: أمممم، أنا قولتلك يا بابي أنا مش عاوزة سواق، أنا بسوق وخلاص.
شريف بإصرار: وأنا قولتلك برضه إني مش هطمن عليكي غير مع سواق يا ريما، فمتوجعيش قلبي، وأنا حاسس إنك هترتاحي مع أحمد.
بصت ريما لأحمد بغرور، ورجعت بصت لأبوها بقلة حيلة: أوك بابي، هسيبك بقي عشان عندي معاد مهم أوي، ادعيلي.
شريف بفضول: ربنا معاكي يارب، بس رايحة فين؟
ريما بحماس: عندي ميتنج مهم في شركة رجل الأعمال عز الدين الراوي، هو اللي طلب يقابلني عشان نتكلم في شغل هيطلبه من مصانعنا، ادعيلي الديل يتم بقي.
شريف بتكشيرة: ما بلاش يا ريما، الراجل ده اسمع عنه إنه مش تمام، وسمعته مش قد كدة في السوق.
ريما كانت هتتكلم، بس بصت لأحمد وقالتله ببرود: ممكن تتفضل بقي مكانك ولا هتفضل مكمل معانا المحادثة؟
أحمد بصلها بجمود ومردش عليها، ومشي، لكنه كان في قمة غضبه، بس حاول يتحكم في نفسه زي ما وصاه أبوه.
شريف بعتاب: عيب كدة يا ريما، أنتي أحرجتيه، مش ده اللي ربيتك عليه.
ريما ببرود: بابي، النوعية دي من الناس مش لازم تتعامل غير كدة، وبعدين ده لسة أول يوم ليه، فمش لازم نثق فيه يعني.
شريف بيأس: لسة تصرفاتك زي أمك، كان نفسي تتغيري بس للأسف.
ريما بتهرب: طيب همشي أنت عشان متأخرش عالميتنج، ومتقلقش عليا أنا أعرف ازاي احمي نفسي.
شريف بقلة حيلة: تمام يا بنتي، ربنا يحميكي يارب.
ريما بابتسامة: باي بابي، أشوفك عالعشا.
في العربية كانت قاعدة ريما ورا، وأحمد سايق وباصص قدامه بجدية، لحد ما سمع صوتها بتكلمه ببرود: اقف على جمب هنا.
أحمد بجدية: تمام يا فندم، بس ليه؟
ريما بحدة: أنت هتحاسبني لما أقولك تقف؟ تسمع الكلام وتقف، أنت فاهم.
أحمد وقف العربية فعلاً على جمب، وبعدين بصلها بحدة واتكلم: أولاً صوتك يبقي واطي وأنتي بتكلميني، ثانياً أنا مليش إني أتدخل في خصوصياتك، لكن ده شغلي وأنا مينفعش أقف في طريق سريع عشان كدة سألتك، ثالثاً لو صوتك ده عليّ تاني مش ضمنلك رد فعلي معاكي إيه، فخدي بالك.
ريما بتوتر: أنت اتجننت؟ بتكلمني كدة؟ أنت مش عارف أنا مين؟ طب حتى خاف أحسن أرفدك، ولا مفكر إن الواسطة اللي جاي بيها هتقوي قلبك.
أحمد ببرود: ومين قالك إني جاي بواسطة؟ أنا جاي بإرادتي يا ريما هانم، ومحدش يقدر يجبرني على حاجة، ولو عالشغل اللي بالشكل ده فأنا مش عاوزه، عشان تعرفي بس إنه بمزاجي مش بمزاجك أنتي.
ريما اتفاجأت بأحمد بيفتح باب العربية وبينزل وبيسيبها ويمشي، فنزلت بسرعة وهي بتتكلم بصوت عالي وخوف: استني يا زفت، أنت هتسيبني هنا لوحدي في طريق سريع؟ طب افرض حصلتلي حادثة.
أحمد بصوت عالي وهو مكمل طريقه: مش مشكلتي، أنا خلاص مبقتش شغال عندك، تقدري تتصرفي.
بصتله ريما بغضب، وركبت عربيتها وكانت هتسوق هي ببرود، بس اتفاجأت إن مفتاح العربية مش موجود، فشهقت بصدمة، وهي بتنزل بغضب وبتروح ورا أحمد.
ريما بانفعال: أنت يا حيوان، أنت مش مكفيك اللي عملته كمان سرقت المفتاح عشان مقدرش أسوق أنا؟
أحمد وقف وبص لريما بصة خلتها تخاف، وخصوصاً أما اقرب منها هو ووقف قدامها.
أحمد بهمس مرعب: أنتي قولتي إيه دلوقتي؟
ريما بكدب وخوف من نظرة أحمد: بقولك إنك أخدت مفتاح العربية صح.
أحمد بثقة: أيوة أخدته، لأنه عهدة ولازم أسلمه لشريف بيه بنفسي، وأبلغه إني مستقيل.
ريما بتذمر: طب وأنا ومعادي اللي كمان نص ساعة ده؟ أنت بجد مش هتسيبني كدة؟
أحمد بخبث: هي حالة واحدة بس اللي مش هسيبك فيها وأمشي: إنك تعتذري مني على أسلوبك معايا.
ريما بغيظ وغضب: أنت بتستغل موقفي، استني بس أروح لبابي وهوريك.
أحمد ببرود: مش هفضل واقف كتير قدامك، دقيقة.
ريما بغيظ: أنا آسفة، ممكن توصلني بقي؟
أحمد بابتسامة انتصار: تمام يا ريما هانم، اتفضلي قدامي.
ريما بصتله بغضب وسابته وراحت العربية وهو وراها، وعلي وشه ابتسامة جذابة.
كانت قاعدة ريما في مكتب عز الدين، لكنها كانت متوترة لأن نظراته ليها مكنتش مريحاها.
عز الدين بإعجاب: عارفة يا آنسة ريما، أنا معجب أوي بإصرارك على إنك تقفي مكان والدك في المصانع، وتكوني الولد اللي كان نفسه فيه.
ريما باستفهام: وحضرتك عرفت منين إن بابا كان نفسه في ولد؟
عز الدين بثقة وغرور: أنا مفيش نملة بتعدي من قدامي ومعرفش إيه قرارها، بس حقيقي معجب بإصرارك أوي، وعشان كدة وافقت إننا نشتغل مع بعض، رغم إني عارف إن الدنيا عند والدك واقعة كتير، بس قولت مش مهم كله عشان خاطر عيونك.
ريما بتهرب: احم، شكراً، طيب بمناسبة الشغل ممكن نتكلم فيه، حضرتك عاوز إنتاج قد إيه؟ وإن شاء الله التسليم هيكون زي ما حضرتك تؤمر.
عز وهو بيقرب من كرسي ريما: أنا عندي استعداد أعمل عقد بسنين كتير أوي يا ريما، بس أنول شرف رضاكي عني.
ريما بتوتر: حضرتك تقصد إيه؟ مش فاهمة.
عز بابتسامة: يعني توافقي على عزومتي عالعشا، وأنا متأكد إننا هنتفق بعدها علطول، واهو نتعرف على بعض أكتر.
ريما بتردد: طيب مش ممكن نتفق الأول، وبعدين نحدد العشا في أي مطعم، واهو نحتفل بالاتفاق بينا.
عز بخبث: لا، الاحتفال ده هيبقي في مكان خاص، أنا وأنتي فقط.
ريما بانفعال وهي بتبعد: عز، أنت إنسان مش محترم، وأنا من بدري بحاول اتجاهل تلميحاتك السخيفة، لكنك مصمم، دلوقتي فهمت أنت جبتني هنا ليه.
عز ببرود: تعرفي إنك عجبتيني كدة أكتر؟ أنا بحب النوعية دي اللي مش بتستسلم بسهولة.
