ريما بصوت مخنوق: أنا فعلاً غبية إني روحلته، بس خوفي علي بابي والمصانع اللي كبرها هو بشقاه وتعبه سنين كتير، واللي هيحصله لو راحت منه، ده اللي خلاني عملت كدة، جايز اتصرفت غلط، بس أنا كانت نيتي أنقذ والدي، وكان عندي أمل إني اتفاوض معاه من غير ما أخليه يقرب مني، ويمكن وجودك معايا هو اللي خلاني أخد الخطوة دي، أنا آسفة يا أحمد، بس حقيقي أنا مش كدة أبداً.
كانت بتتكلم ريما بانهيار ودموعها بتنزل، وأول ما خلصت كلامها كانت هتمشي، بس أحمد لحقها لما مسك إيديها.
أحمد بهدوء: أنا اللي آسف يا ريما، بس كل ما افتكر إن كان ممكن يحصلك حاجة أحس إني هتجنن، أنا عارف ومتأكد إنك مش كدة أبداً، أتمني متزعليش من كلامي.
ريما كانت باصة لأحمد وهو بيتكلم، وفجأة ابتسمت من بين دموعها بطريقة بريئة خلت قلب أحمد يدق جامد، واتوترت وهو بيبعد إيده عن إيديها.
أحمد بابتسامة: أفهم من كدة إنك مش زعلانة؟
ريما بتلقائية وهي بتسمح دموعها: بشرط واحد، إنك تاخدني عند مامتك، أنا عاوزة أشوفها.
أحمد بابتسامة: طبعاً موافق، يلا روحي البسي ونروح حالاً.
ريما بفرحة وحماس: بجد حالاً؟ وهكون جاهزة، استناني هنا ماشي؟ مش هتأخر.
جريت ريما، وكان متابعها أحمد بابتسامة، وهو حاسس بإحساس غريب وجديد عليه، أول مرة يحس بيه، بس كان مبسوط أوي.
كانوا قاعدين كلهم عالاكل، وريما كانت فرحانة أوي وهي متابعة كلامهم وضحكهم، وخصوصاً أحمد اللي كان كل شوية تتقابل عنيها بعنيه.
صابرين بابتسامة: تعرفي يا ريما، أنا أول ما شوفتك قولت إنك بنت حلال، وزينا كدة، مصدقتش لما عرفت إنك بنت زوات.
ريما بابتسامة: وأنا كمان يا خالتي صابرين، متخيلتش إني هحس بإحساس العيلة وسطيكم، وإن يكون ليا حد يحبني ويهمه أمري أوي كدة.
زينب بخبث: لا من ناحية اللي يهمه أمرك، فمفيش زي أحمد بصراحة، ليل نهار يكملني عنك وعن قد إيه هو بيخاف عليكي.
ابتسمت ريما بتلقائية وبصت لأحمد اللي ابتسم بإحراج وهو باصص ليها.
ريما بخجل: أنا شبعت الحمد لله، تسلم إيديكي يا ماما زينب، هروح أنا أعمل الشاي.
أحمد بسرعة: وأنا هساعدك.
ابتسمت صابرين وزينب وبصوا لبعض بفرحة، وفي نفس الوقت كانت ريما وأحمد دخلوا المطبخ.
ريما بابتسامة: أحمد، أنا متشكرة أوي عاليوم الحلو ده، بجد أول مرة أحس إني عايشة.
أحمد بتردد: يعني ممكن ترضي إنك تعيشي هنا علطول يا ريما، ولا هيبقي صعب؟
ريما باندفاع: أيوة طبعاً، أقصد، يعني إني طالما هكون سعيدة زي دلوقتي كدة، يبقي ليه لا، أهم حاجة سعادتي.
أحمد بسعادة: للدرجادي أنتي متمسكة بالعيشة هنا؟
ريما بقصد: قصدك متمسكة بيكم، أحمد أنا حسيتكم عيلتي اللي طول عمري بحلم يكون عندي زيها، حد يحبني ويخاف عليا، أم تدعيلي وأنا خارجة وتقلق لو غبت عنها.
زينب من وراهم بحب: وأنا يعلم رينا، اعتبرتك بنتي اللي مخلفتهاش، ومني حياتي إنك تيجي تعيشي معانا هنا، بس أنتي توافقي تتجوزي الواد أحمد ده.
ريما اتكسفت وبصت لأحمد اللي قال لأمه بعتاب: ماما، ملوش لازمة الكلام ده لو سمحتي، ومتنسيش إن آنسة ريما تبقي صاحبة الشغل.
ريما بصت لأحمد بحزن، واتمنت لو أحمد كان طلب حتي رأيها قدام مامته، وهي كانت هتختاره امتي وازاي؟ بس فعلاً حبته، وده اللي اتأكدت منه
