منه كانت حاضناني وبتعيط بصوت مؤثر وقالتلي يا ماما.. هو لما بيبقى طبيعي بيكون أحسن زوج في الدنيا.. بس لما بتجيله الحالة بيبقى حد تاني خالص! كان بيتمسك بيا ويقفل عليا الأوضة، ويوم ما كلمتيني فيديو كان لسة هادي من نوبة تعب، وما رضيتش أقولك عشان ما أخربش بيتي وعشان كنت خايفة عليكي من الصدمة.. والنهاردة الصبح جاتلي الحالة تاني عشان كده مكنتش مستنياكي!
الكلمات كانت بتنزل عليا زي الصاعقة. السر اللي عملوا المستحيل عشان يداروه.. مش بس إن ابنهم مريض، السر إنهم ضحوا ببنتي واستغفلوا يتمها وعجزها، واستخدموها كطرف يساعد في علاج ابنهم المريض! كانت بالنسبة لهم مش راعيتها بالشكل السليم!
وقفت والشرار بيطلع من عيني، ماسكة إيد منه بقوة وقلت لمحمد وأمه أنتم مش بني آدمين! تبيعوا وتشتروا في بنتي اليتيمة عشان تعالجوا ابنكم؟ الدكاترة قالولكم اتجوزوا فتروحوا تلبسوا بنت ناس ملهاش ذنب في القرف ده لو انتو بالطيبه اللي بتوصفوها كنتو عرفتونا وسبتونا نختار؟!
أم محمد بكت وقالت سامحينا يا سناء.. إحنا غلطنا، بس والله كنا ببنأمل إنه يطيب..
صړخت فيها يطيب على حساب دم بنتي وحياتها؟! فرضنا في مرة حصل مكروه أكبر؟ ساعتها كنتوا هتقولوا إيه؟! قضاء وقدر؟!
محمد قام وقف وقرب مني وهو بيترجاني يا حماتي، أنا مستعد أتعالج! والله هروح لأكبر دكاترة في القاهره، بس ما تاخديش منه مني.. أنا والله بحبها!
بصيتله بحدة وقولتله بصوت حاسم يقطع العرق تحبها ولا تولع! بنتي مش هتقعد معاك ثانية واحدة كمان.. إنت محتاج علاج ومكانك المستشفى مش البيوت! منه ماشية معايا حالا، وورقة طلاقها تجيلي لحد بيتي في القاهره، وإلا والله العظيم أروح للعمده ولمركز الشرطة وأبلغ عنكم باللي عملوتوه في بنتي وبالشهادات الطبية اللي بتثبت الضرر، وأفضحكم في البلد كلها!
محمد وأمه ونهلة اتجمدوا في مكانهم. الكلمة طلعت مني زي السيف.
مسكت إيد منه، وشدتها من الأرض. البنت كانت خايفة ومترددة، بس لمست في عيني إصرار الأم اللي مستعدة تهد الدنيا عشان حماية بنتها. منه بصت لمحمد بصة ألم ووداع، وجمعت بقايا قوتها وقامت معايا.
محمد حاول يقف في طريقنا عند الباب، بس بصيتله بصة خلت رجله تتسمر في الأرض. قولتله بنبرة حازمة اوعى تفتكر عشان ابوها ماټ يبقى ملهاش حد.. أنا بألف راجل يا محمد، ولو قربت خطوة واحدة كمان هحرقلك البيت ده باللي فيه.
خرجت من البيت وأنا ماسكة إيد بنتي، والبلد كلها كانت هادية والزرع حولين الطريق متعرج وزي ما قال.. بس المرة دي كنت ماشية بخطوات ثابتة وسريعة، مش خايفة ولا مترددة.
منه كانت بتعيط طول الطريق، وأنا ضماها لصدري وبمسح دموعها وأقولها خلاص يا قلب أمك.. الكابوس خلص. حقك عليا إني رميتك في المكان ده وأنا مش دارية، بس وحياة دموعك دي لأرجعلك حقك وكرامتك.
ركبنا أول عربية رايحة القاهره. وقعدت جنبي في العربية، حاطة رأسها على كتفي، ونامت من التعب والإرهاق كأنها بقالها ١٥ يوم مانامتش.
أول ما وصلنا بيتنا في القاهره، دخلتها أوضتها القديمة، غطيتها، وبست رأسها.
وبعد أسبوع واحد.. وتحت التهديد بالمحاضر والقضايا، جالي طلاق منه لحد باب البيت، ومعاه كل حقوقها وحاجتها.
عرفت بعدها إن محمد أهله اضطروا يدخلوه مصحة نفسية للعلاج بعد ما حالته ساءت جداً بعد ما منه مشيت.
قعدت مع منه في البلكونة، بنشرب شاي في القاهره، والشمس طالعة بتدفي المكان. منه بصتلي وابتسمت لأول مرة من شهر، ابتسامة حقيقية طالعة من قلبها وقالتلي شكراً يا ماما.. لو ماكنتش جيتي في اليوم ده، كان زماني تعبانة هناك ومحدش حاسس بيا.
ضمتها لصدرى وقولتلها قلب الأم دليل يا منه.. وأنا أمك، يعني حارسك الضامن في الدنيا دي.. ومفيش قوة على الأرض تقدر تؤذي تحويشة عمري وأنا حية يرزقني ربي.
قالتلي بدموع بس انا كنت بحبه مش هاين عليا اننا اتخلينا عنه كده.
ابتسمت وقولتلها احنا متخلناش عنه يا حببتي احنا اشترينا امانك هو لو كويس كان حكالك وخيرك وبكره لو خف وربنا كرمه وخرج من المستشفى هيجيلك ووقتها يحلها الف حلال.. مهما حصل تاني مش هسيبك تبعدي عن عيني يوم واحد.
منه ابتسمت وحضنتني وهيه مطمنه.
ومن يومها، عرفت إن الأصول مش كلام حلو وضحك في الوشوش، الأصول هي الفعْل والرحمة.. واللي يفرط في بنته عشان كلام الناس، يبقى ما يستاهلش يكون كلمة أب أو أم.
بقلم: زهرة الربيع
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
