قام وراح على المطبخ يعمل شاي وانا بقيت أبص حواليا بقلق وشك بياكل فيا… معقولة بنتي تمشي وهي عارفة إن أمها جاية وعلى وصول؟ ومعقولة حماتها تبعتلها اصلاً في يوم زي ده وهي عارفة إني جاية أزورها؟ في إنّ في الموضوع.. فيه حاجة غلط شغالة من ورايا!
أول ما خرج محمد من المطبخ وشايل صينية الشاي، وقفت بسرعة ومن غير مقدمات قولتله هنشرَب الشاي عند والدتك.. هروح أطمن عليها بالمرة وأشوف بنتي هناك.
محمد اتصدم، والشاي وقع من إيده والصينية اترزعت على الأرض اتكسرت !
أنا استغربت أكتر وأكتر، وركبي بقت تخبط في بعضها من القلق على بنتي..
محمد حاول يهدى بس ملامحه كانت فاضحاه وعرق غريب نازل من أورته، قالي وهو بيتأتأ طب.. طب ما ممكن تستنيها هنا يا حماتي؟ يمكن شوية وتيجي.. أو.. أو تبقي تزوريها يوم تاني، أمي تعبانة و..
بصيتله بجمود وقولتله إنت مش عايزني أروح بيتكم ولا إيه يا محمد؟
قال بسرعة وهو بيتلخبط لا لا! ده كلام برضه يا حماتي؟ أنا قصدي يعني بدل ما تتعبي نفسك.. إنتي عارفة الطريق لحد بيت أمي زرع ومتعرج وهيتعبك في المشي.
ما أديتوش فرصة يكمل، مسكت شنطتي بقوة واتجهت بخطوتي ناحية الباب وأنا بقول أبداً، مفيش تعب ولا حاجة.. الحجة تعبها راحة ولازم أطمن عليها بنفسي، مش أصول أبداً أمشي وهي تعبانة وأنا على بابها.
نزل معايا ومحمد بيمشي خطوة ويرجع خطوة، كان متوتر بشكل مش طبيعي، عينيه كانت بتزيغ في الزرع حوالينا وكان بيتنفس بصعوبة. وأنا ماشية جنبه وبصات التوتر دي بتخليني أغلي من القلق.. قلبي كان بيتقطع وبيتنفض، يا ترى إيه السر اللي مخبيينه عني؟ بنتي مالها وايه اللي بيحصلها في البلد دي؟
وصلنا بيت أمه.. بيت طين قديم محاط بالشجر، الباب خشبي كبير محمد قرب وخبط بقلق.. وأول ما اتفتح ودخلنا فهمت كل المستخبي واتكشف السر اللي عملوا المستحيل عشان معرفهوش وياريتني ما عرفته الصدمة كانت أكبر من عقلي بكتير!!!!
أول ما الباب اتفتح، خرجت منه نهلة، أخت محمد.. بس وشها كان أصفر زي الليمونه، وعينيها رايحة جاية بقلق بيني وبين محمد. محمد أول ما شافها، هز رأسه حركة خفيفة وسألها امك عامله ايه؟، وهي هزت رأسها وعينيها مليانة دموع!
دخلت البيت وأنا رجلُيا مش شايلاني الريحة جوه البيت كانت غريبة، ريحة بخور مع ريحة أعشاب كتمت نفسي، والبيت كان مظلم من بره رغم إننا كنا في عز الظهر.
صوت أنين دافئ وجاي من آخر الكوريدور، صوت أم محمد.. بس مش أنين تعب عادِي، ده كان صوت شديد!
قلت بقلق وصوت مرتجف بسم الله.. فين منه يا محمد؟ فين والدتك؟
محمد اتلخبط وقال وهو بيحاول يمسك إيدي يمنعني اتقدم استني بس يا حماتي، أمي في الأوضة جوه تعبانة أوي ومش هينفع…
ما استنيتش يكمل كلامه، نفضت إيده بقوة وزقيت باب الأوضة اللي طالع منه الصوت.. وهنا كانت الصدمة اللي خلت قلبي هيقف، وركبي مش شيلاني!
على السرير كانت نايمة أم محمد، بس مش زي ما عرفتها يوم الفرح.. وشها كان شاحب، وعينيها مربوطة بشاش أبيض من جبهتها. وجنب السرير.. منه!
منه بنتي، تحويشة عمري، كانت قاعدة على الأرض، إيديها وجسمها كله بيترعش، ولابسة جلابية مقطعة من عند الكتف، وعلى دراعها أثر كدمات! البنت كانت ماسكة طبق فيه مية دافية وبتكمد جبهة حماتها، وأول ما دخلت وبصيتلي، عينها جات في عيني.. وغطت وشها بإيديها وبقت تبكي بتأثر وتشهق ماما! يماما امشي.. امشي من هنا أرجوكي!
أنا وقفت متثمرة في مكانى، عقلي مش قادر يستوعب المشهد. قربت منها، اترميت على الأرض وجريت مسكت إيديها، لقيتها بتترعش.
رفعت وشها بالعافية، زعقت بأعلى صوت عندي وصوتي زلزل البيت إيه ده؟! إيه اللي جرالك يا منه؟! مين عمل فيكي كده يا بنتي؟! انطقييي!
منه كانت بتبص لمحمد ولأخته وقلق الدنيا كله في عينيها، ومش قادرة تنطق بكلمة، بس تبكي وتترجاني أمشي.
محمد دخل الأوضة بسرعة وقفلت نهلة الباب وراهم. محمد جرى عليا وقالي بصوت متوتر ومخنق اهدي يا حماتي اهدي.. والله ما حد قربلها، افهمي بس الأوّل!
قمت في وشه أفهم إيه يا بنى آدم؟! إنتوا كنتو رابطين بنتي؟ ولا بتضربوها؟! دي الأصول اللي اتفقتوا عليها؟! دي الشقة اللي بعيد عن بيتكم؟ إيه اللي جابها هنا وإيه العلامات دي؟!
قامت أم محمد من على السرير بصعوبة، وصوتها كان طالع بصعوبة وقالت وهي بتلهث حقك عليا يا سناء يا أختي.. السر اللي خبيناه عليكي كان عشان نحمي عيلتنا، بس خلاص، جه الوقت اللي تعرفي فيه الموضوع اللي إحنا فيه.
رجعت لورا خطوة وأنا حاضنة منه ضماها لصدري، ودموعي نازلة.
أم محمد كملت وهي بتبعيط بحشرجة محمد ابني.. عنده مرض من صغره. بيجيله نوبات متكررة كل فترة، يفقد فيها تركيزه تماماً ومبيعرفش أبوه ولا أمه ولا مراته.. يكسر أو ينفعل على أي حد قدامه ويهجم عليه وهو مش حاسس بنفسه! عشان كده حطيناه في بيت لوحده بعيد عن الناحية التانية من البلد..
قلبي اتخلع من مكانه، بصيت لمحمد بصة زعل وقلق، عشان كده نهلة أخته ضحكت يوم الفرح، لأنها كانت عارفة إننا بنتورط وبيخبوا عليا الحقيقة! قولت بصوت مبحوح يعني إنتوا جوزتوه لبنتي عشان يفرغ فيها تعبه ومرضه؟! إنتوا استغفلتوني عشان كنتوا عارفين إني ماليش راجل يسندني؟!
محمد نزل على ركبه قدامي وبكى بدموع حقيقية والله العظيم يا حماتي أنا بحب منه! أنا الدكاترة قالولي إن العلاج إني أتجوز وأستقر والنوبات هتقل.. بس بقالي أسبوع النوبة بتجيلي شديدة، وأنا والله العظيم لما بكتشف إني أذيتها بعد ما بفوق، بكون زعلان جداً على اللي عملته! الصبح حصل انفعال جامد وبقى عندها كدمات عشان كده جات هنا.. ده حتى أمي كانت في شقتنا مستنياكي وهي بتحاول تمنعني، أنا زقيتها وقعت اتخبطت في رأسها وعينيها اتصابت!
