الساعة واحدة وسبع دقائق الصبح، أكتر زعيم مافيا مهوب في مصر مسكني وأنا بصلح سرًا فستان سهرة تمنه تمانين ألف جنيه يخص أمه المتوفية، جوه غرفة الغسيل في الفندق. كنت مطلعة الفستان الممزق ده من كيس زبالة، وعمري ما تخيلت إن كام غرزة خياطة ممكن تفضح سر مدفون من خمس سنين.
بس لما مراد السويفي وراني صورة على موبايله، حسيت إن فيه حد سرق مني أكتر بكتير من مجرد تصميمات. اسمي سارة، وعمري واحد وتلاتين سنة. بشتغل بالليل عاملة نظافة في فندق كبير في وسط البلد، هناك الضيوف الأغنياء مابياخدوش بالهم أصلًا من الستات الغلابة اللي بينضفوا الأوض وراهم.
صاحبي الشغل أو بمعنى أصح مدير الفندق وصاحبه، مراد السويفي، عنده تمانية وتلاتين سنة، وبيملك فنادق فخمة وشركات شحن، وبيت أزياء “السويفي” اللي أمه أسسته زمان. ورا البزنس الكبير ده كله، هو كمان بيتحكم في واحدة من أقوى عصابات المافيا في مصر. الناس كلها بترتعش لمجرد سيرته.
أنا متعودة ماببصش في عينه أصلًا. أنا متمسكة بالشغلانة دي بأسناني. الإيجار متأخر عليا، وأختي حبيبة اللي عندها اتنين وعشرين سنة عندها قسط مدرسة التمريض يوم الجمعة الجاية. أنا سندها الوحيد في الدنيا دي بعد أمنا. أمنا، نعمة، كانت خياطة شاطرة، وهي اللي علمتني الخياطة وأنا لسه عندي سبع سنين.
ولما وصلت ستاشر سنة، كنت بقدر أحول أي رسمة عادية بالقلم الرصاص لفستان شيك وراقي، ولما بقيت تلاتة وعشرين، ربنا كرمي بمنحة في مدرسة تصميم الأزياء. بس أمنا عيت عيا شديد. مصاريف المستشفيات خلصت كل اللي ورانا واللي قدامنا، وبقيت أغيب عن المحاضرات عشان أخدمها، لحد ما في الآخر اضطريت أسيب المنحة خالص.
وماتت هي السنة اللي بعدها. خمس سنين كاملة، وتصميماتي مرمية في كراتين تحت السرير.. لحد الليلة دي. الفندق كان عامل حفلة خيرية كبيرة، وكنت بلم الزبالة من أوض التحضير والضيوف قاعدين يشربوا شامبانيا تحت النجف الكريستال. في اللحظة دي، لمع حرير أرجواني طالع من كيس زبالة مقطوع.
وجوه الكيس كان فيه أجمل فستان سهرة شفته في حياتي. حرير بنفسجي ملكي بيلمع تحت الكريستال، وحوالين الوسط فيه فرع شجر ذهبي صغير معمول بحرفية عالية. بس للأسف، كان فيه شق طويل مقطوع في القماش، وشوية أوراق مطرزة ضايعة، وعليه كرتونة صغيرة مكتوب عليها: “يُرمى.. تالف”.
كان المفروض أسيبه مكانه وأمشي. بس تفتكرت كلام أمي الله يرحمها دايماً: “يا سارة، الناس بترمي الحاجات الحلوة بسرعة أوي. أحياناً هما بس بيبقوا محتاجين حد حنين يصلحها.” خدت الفستان ونزلت على تحت، ودخلت أوضة غسيل فاضية، وطلعت شنطة الخياطة الصغيرة بتاعتي.
غرزة ورا غرزة، ولقيت نفسي برجع الأوراق الذهبية اللي ضايعة. ولأول مرة من سنين، نسيت الفواتير اللي عليا ومصاريف حبيبة. إيدي افتكرت المستقبل اللي ضاع مني. وفجأة الباب اتفتح. مراد السويفي كان واقف قدامي لابس بدلة سموكنغ سودا، وعينه الرمادي الباردة مسمرة على الفستان.
“بتعملي إيه بده؟ ومنين جبتيه؟”
قلبي اتقبض: “أرجوك يا باشا، والله ما سرقته.”
قرب مني بالراحة: “الفستان ده كان ملك أمي. وهي مدفونة من ست سنين.”
بلعت ريقي بصعوبة: “لقيته في الزبالة.. حد كان مقطعه ومبوظه.”
“وقررتِ إيه بقى؟”
“قلت حرام.. حاجة حلوة زي دي حرام تترمي لمجرد إن حد أذاها.”
سكت خالص. وبعدين مد إيده ولمس ورقة من الذهب اللي صلحتها: “أمي هي اللي مصممة الرسمة دي بنفسها.”
“أنا آسفة يا باشا، لو بوظته.”
سحب كرسي وقعد جنبي وفحص القماش كويس. وبعد صمت طويل أوي، همس بصوت هادئ: “مش قادر ألاقي مكان الشق.”
حسيت بروحي ردت فيا: “ده معناه إن الغرز ظبطت.”
“مين علّمك؟”
“أمي الله يرحمها.”
فضل باصص للتطريز تاني بتدقيق: “واتعلمتي الطريقة دي فين بالذات؟”
اترددت شوية: “ليه بتسأل؟”
طلع موبايله وفتح صورة: “عشان أنا أعرفها كويس.”
أنفاسي وقفت. على شاشته كان فيه فستان أنا مصمماه وأنا في مدرسة التصميم، تصميم عمري ما وريته لحد بره سور المدرسة أصلاً.
التفت ناحيتي وعينه في عيني: “يا سارة، واحدة شغالة عاملة نظافة في فندق، تعرف إزاي تعمل تصميم شركتي بتقول إن حد تاني هو اللي عامله؟”
فضلت باصة للصورة وشفايفي ناشفة ومش قادرة أنطق بكلمة. وبعدين كبر الصورة بصباعه وشاور على اسم مكتوب بخط صغير تحت التصميم المسروق بتاعنا.
“تعرفي البني آدم ده؟”
بطني اقلبت. لأن الاسم ده كان اسمي، وعرفته في ثانية.
#حكايات_شروق_خالد
