بعد نص ساعة كنت قاعد قدام الشباك اللي بيطل على النيل والخاتم مرمي على المكتب قدامي
جاسر دخل وبصلي باستغراب
إيه يا عم مالك وشك مخطوف كده ليه
رفعت عيني ليه وقلت
أنا شوفت مريم
سكت
وبعدين قعد على الكرسي اللي قدامي
مريم اللي اختفت من ست سنين
هزيت راسي
ومعاها أربع عيال عندهم ست سنين
فضل باصصلي شوية وبعدين قال
أدهم إنت بتقول إيه
قلتله وأنا بحاول أسيطر على نفسي
أربع ولاد يا جاسر كل واحد فيهم شبه صورتي وأنا عندي ست سنين
جاسر سكت لحظات وبعدين سألني السؤال اللي كنت مرعوب أسمعه
إنت شاكك إنهم ولادك روايات_مشيره_محمد
بصيت للخاتم على المكتب
أنا مش شاكك يا جاسر أنا عايز أعرف الحقيقة
رد بحذر
طب هتعمل إيه
قمت من مكاني ووقفت قدام الشباك
هعرف هي اختفت ليه وهعرف مين أبو العيال دول
جاسر قرب مني وقال
بس خلي بالك يا أدهم لو طلعوا ولادك فعلًا يبقى لازم تتصرف بعقل مش بغضب
لفيت ناحيته
أنا مش هأذيها يا جاسر أنا بس مش هسمح إنها تسرق مني ست سنين كمان من غير ما أفهم السبب
تاني يوم الصبح بدأت أدور على مريم
ماكنش عندي عنوانها الجديد لكن بعد محاولات كتير عرفت إنها ساكنة في شقة متواضعة في مصر الجديدة وبتشتغل في معمل تحاليل صغير
روحت هناك بنفسي
استنيت لحد ما خرجت من باب المعمل وكانت شايلة شنطة كبيرة وفي إيدها كيس أدوية
أول ما شافتني اتنهدت بتعب
أدهم إنت بتعمل إيه هنا
قلت بهدوء
عايز أتكلم معاكي
مفيش كلام بينا
يبقى هنتكلم عن الأولاد
وشها شحب
قلت وأنا ببصلها في عينيها
أنا عايز أعرف الحقيقة يا مريم
سكتت شوية وبعدين قالت
الحقيقة مش هتغير حاجة
هتغير كل حاجة
بصت حوالينا بقلق وبعدين قالت
مش هنا
مشينا لحد كافيه صغير في شارع جانبي وقعدنا على ترابيزة بعيدة عن الناس
فضلت ساكت لحد ما هي اللي اتكلمت
إنت اتخطبت
السؤال فاجأني
لسه لأ
بس كنت هتخطب النهارده
هزيت راسي
أيوه كنت هطلب إيد ليلى البارون
ابتسمت ابتسامة حزينة
مبروك
اتعصبت
مبروك إيه يا مريم إنتي فاكرة إني ممكن أفكر في خطوبة بعد اللي شوفته امبارح
ردت ببرود مصطنع
حياتك تخصك يا أدهم
ضربت بإيدي على الترابيزة لكني سيطرت على نفسي بسرعة
وأولادي مش من حقي أعرف عنهم حاجة
دموعها لمعت في عينيها
إنت متقدرش تقول إنهم أولادك لمجرد إنهم شبهك
قلت فورًا
عندك حق
وبعدين طلعت نفس طويل
عشان كده عايز أعمل تحليل DNA
مريم سكتت
فضلت باصص لها وأنا مستني ردها
بعد وقت طويل قالت
ماشي
بس عندي شرط
قولي
لحد ما النتيجة تظهر محدش يعرف أي حاجة عن الموضوع ده والأولاد ميعرفوش إنك بتشك إنك أبوهم
وافقت من غير تردد
اتفقنا
لكن قبل ما أقوم سألتها السؤال اللي كان بيقتلني من جوه
ليه مشيتي يا مريم
نزلت عينيها للأرض
ولأول مرة من ست سنين شفتها بتعيط قدامي
رجعت البيت وأنا مش قادر أفكر في أي حاجة غير السؤال ده
ليه مريم سابتني
قبل ست سنين كنت بحبها بجنون وكانت بتحبني هي كمان على الأقل ده اللي كنت فاهمه
لكن قبل جوازنا بشهر اختفت فجأة
تليفونها اتقفل وشقتها اتفضت ومحدش من أصحابها كان عارف مكانها
دورت عليها في كل مكان
وبعد شهور من غير أي نتيجة بدأت أصدق إنها اختارت تبعد عني
جدي وقتها قاللي
اللي يسيبك بإرادته يا أدهم متجريش وراه طول عمرك
وأنا صدقته رغم إن قلبي مكنش مقتنع
بعدها دخلت في شغل العيلة أكتر ودفنت نفسي في الصفقات والاجتماعات لحد ما بقيت الراجل اللي محدش يقدر يقف قدامه
لكن الحقيقة إني عمري ما نسيتها
بعد يومين ظهرت نتيجة التحليل
كنت قاعد في مكتب جاسر لما فتح الظرف وبص في الورق
وشه اتغير
قلتله بقلق
في إيه
رفع عينيه ليا
أدهم النتيجة مؤكدة بنسبة أكبر من تسعة وتسعين في المية
الأولاد الأربعة أولادك
حسيت إن نفسي اتسحب من صدري
أربع ولاد
أنا عندي أربع ولاد
قعدت على الكرسي وأنا مش قادر أستوعب
ست سنين من عمري فاتوا وأنا مش عارف إن ليا عيال
ست سنين كنت ممكن أشوفهم بيكبروا قدامي وأعلمهم العوم وأحضر أول يوم مدرسة ليهم وأسمعهم بينادوني بابا
لكن مكنتش موجود
سندت راسي بين إيديا
جاسر قعد جنبي وقال
أنا عارف إن الخبر صعب بس لازم تفكر في الخطوة الجاية
رفعت راسي وقلت
أنا عايز أشوفهم
روحت لمريم تاني يوم ومعايا نسخة من نتيجة التحليل
فتحت الباب ولما شافت الورق في إيديها غمضت عينيها
النتيجة ظهرت
هزيت راسي
أيوه
سكتنا لحظات طويلة
وبعدين قلت بصوت مبحوح
ليه يا مريم
ليه حرمتيني منهم
دموعها نزلت وهي بتقفل الباب ورايا
عشان كنت خايفة يا أدهم
خايفة من إيه
من عيلتك
ضحكت بمرارة
عيلتي
أيوه عيلتك
قعدت على الكنبة وحطت إيديها على وشها
بل ما أختفي منك بشهر كنت عرفت إني حامل
قلبي وجعني
كنتي حامل ومقولتيليش
كنت هقولك يا أدهم والله كنت هقولك لكن في نفس الأسبوع جدك طلب يقابلني
اتجمدت مكاني
جدي
هزت راسها وهي بتعيط
قاللي إنك مش هتتجوز واحدة زيي وإن ارتباطك بيا هيضيع مستقبلك وإن عيلتك مستحيل تقبل بيا
حسيت بالغضب بيغلي في عروقي
هو قالك كده
قاللي كلام كتير ووراني صور ليك مع بنات من عائلات كبيرة وقاللي إنك بدأت تبعد عني وإنك وافقت على جواز تاني
صرخت من غير ما أقصد
ده كدب
أنا عمري ما وافقت على الكلام ده
عارفة دلوقتي إن في حاجات كتير كانت كدب لكن وقتها كنت لوحدي وخايفة
مسحت دموعها وكملت
وبعدين هددني إنه لو حاولت أقولك عن الحمل هيخليني أخسر الطفل وهيستخدم نفوذه عشان محدش يصدقني
وقفت من مكاني وأنا مش قادر أصدق
ليه مصدقتيش إني ممكن أقف في وشه
بصتلي بوجع
عشان إنت نفسك يا أدهم كنت بتقولي إن جدك هو اللي بنى العيلة وإن محدش يقدر يعارضه
سكت
كانت عندها حق
أنا اللي خليتها تشوف عيلتي كأنها قوة محدش يقدر يقف قصادها
كملت وهي بتبص للأرض
هربت من القاهرة وروحت عند خالتي في المنصورة وولدت هناك
لكن بعد الولادة اكتشفت إن الحمل كان أربع توائم وإن واحد من الأولاد كان محتاج متابعة طبية مستمرة
اشتغلت في كل حاجة قدرت عليها عشان أصرف عليهم
مكنتش عايزة فلوسك ولا اسم عيلتك
كنت عايزة أربيهم بعيد عن الخوف
قربت منها وأنا حاسس إن كل كلمة بتوجعني
طب ليه مقولتيليش بعد ما كبروا
عشان كنت خايفة ترجع تاخدهم مني
أنا مش هعمل كده
إنت متعرفش عيلتك يا أدهم
رديت بحزم
يمكن إنتي عندك حق في خوفك من جدي لكن أنا مش جدي
فضلت باصة ليا وقت طويل وبعدين قالت
أنا محتاجة وقت
هديكي كل الوقت اللي تحتاجيه
لكن عندي طلب واحد
إيه هو
عايز أشوف ولادي وأتعرف عليهم واحدة واحدة من غير ما أخوفهم أو أضغط عليهم
بدأت أقابل الأولاد في وجود مريم
كان اسم الأول ياسين والثاني يوسف والثالث عمر والرابع حمزة
ياسين كان هادي وبيحب الرسم
يوسف كان بيتكلم كتير ومش بيبطل أسئلة
عمر كان مشاغب وبيحب يجري في كل مكان
أما حمزة فكان أقرب واحد ليا في الشكل والحركات
في أول مقابلة قعدت معاهم على الأرض ألعب بالمكعبات
يوسف بصلي وسألني
إنت عندك عيال يا عمو أدهم
