كانت الواقفة قُدام المراية بتبص لنفسها بذهول، ودموعها نازلة كأنها شلال مش قادر يقف. صرخاتها كانت طالعة من جرح غاير جوه قلبها، صوتها كان بيهز أركان الأوضة وهي بتبص لأدهم اللي واقف قُدامها مش عارف يعمل إيه ولا يهدّيها إزاي:
«حرام عليك طلقني! مش مكفيك اللي عملته فيا؟ عايز مني إيه تاني؟!»
أدهم بصّلها ودمه بيغلي، بس نبرة صوته كان فيها كمية قهر وألم مش طبيعية. مشي خطوة ناحيتها وهو حاسس إن كل محاولاته عشان ينقذ البيت ده بتتهدم فوق دماغه:
«انتِ اللي حرام عليكي! حسي بيا شوية.. أنا متجوزك من أربع شهور ولحد دلوقتي عايشين زي الأخوات! انتِ اه كنتِ مرات أخويا المتوفي وأنا متكلمتش ولا فتحت بوقي، بس انتِ منعاني من حقي الشرعي والإنساني.. صبرت عليكي كتير ومنعت ضغط أمي عليكي، بس للأسف مفيش فايدة فيكي خالص!»
سيبها أدهم وخرج ورزع الباب وراه بأسلوب يبيّن قد إيه جاب أخرة. سارة فضلت واقفة مكانها، انهارت على الأرض بتبكي بحرقة وسخونة، بتفتكر جوزها وحبيب عمرها الأولياني “كريم”. كريم ده ماكانش مجرد زوج، ده كان الأمان والسند وكل حاجة حلوة شافتها في دنياها.
تزوجت سارة من كريم بعد قصة حب طويلة أوي، قصة عاشت وتغذت على السنين. بتفتكر أيام زمان لما صاحبتها الانتيم كانت بتحاول تقنعها إن ده مجرد حب طفولة وطيش شباب، وإنها لما تكبر وتدخل الجامعة هتكتشف إنه مجرد ذكري عابرة ووهّم.. بس الحقيقة إن مقدار حبها لكريم كان بيزيد ويكبر مع كل يوم يمر. دخلت معاه نفس الجامعة، وعاشت أيام صعبة لما كان خاطب زميلة ليهم في الدفعة. كانت بتتألم من جوة قلبها لما تشوفه ماشي معاها أو بيضحك ليها، بس كانت دايماً بتتمنى له السعادة من كل قلبها، لأنها كانت مقتنعة بإخلاص إن اللي بيحب بجد بيضحي عشان سعادة اللي بيحبه حتى لو مش معاه.
بس كريم ماعرفش ولا حس بمقدار حبها الحقيقي وقيمته في حياته إلا اليوم اللي تقدم فيه شخص تاني عشان يطلب إيد سارة.. وقتها الدنيا اتكركبت فوق دماغه، وحس إن الأرض بتتسحب من تحت رجليه.
*** فلاش باك ***
دخل كريم الأوضة وشه أحمر من الغضب، وعيونه بتطلع شرار. مسكها من دراعها بعصبية شديدة:
«انتِ غبية صح؟! انتِ ازاي توافقي عليه وتخليه يلمس عتبة بيتكم؟!»
سارة بصتله بثبات ودفا رغم الخوف اللي كان جواها وردت عليه بتهدئة:
«وإيه المشكلة يا كريم؟ ياسر إنسان كويس ومحترم وجاهز، وهيراعي ربنا فيا.. إيه اللي يعيبه؟»
كريم بصّ في عيونها ومسك أيديها بصوت مخنوق:
«بتحبيه يا سارة؟ جاوبيني بصراحة.. بتحبيه؟»
سارة نزلت عيونها للأرض وقالت بنبرة هادية مليانة حكمة:
«في حب اسمه حب عشرة يا كريم.. الحب ده بيجي بعد الجواز، رابط قوي بين اتنين أهم حاجة فيه الرحمة والاحترام والود.. والمودة بتكبر مع الأيام.»
كريم ساب إيدها بحدة وقال وهو خارج وبيصرخ:
«خلاص انتِ حرة يا سارة! بس اعرفي إنك واحدة غبية وبتضيعي نفسك!»
ابتسمت سارة وسط دموعها وهي بتفتكر اليوم ده.. بتفتكر إزاي كريم هرب وما جاش يوم خطوبتها من ياسر، وإزاي صمم وعزم بكل قوته إنه يهد العلاقة دي وما يخليهاش تكتمل. وبعدها ظهر زي الفارس النبيل العازم إنه يتجوزها هي وبس.. وقف قُدام العيلتين وعارض الجميع وفضل يقاتل لحد ما اتجوزها في النهاية.
عاشت معاه أروع خمس سنوات في حياتها؛ خمس سنين كانوا عبارة عن شهد ونعيم. أثمرت الجوازة دي عن طفلين زي الملايكة: “حازم” و”حمزة”، اللي ما تخطوش وقتها عمر سنتين. بس يا فرحة ما تمت.. القدر كان مخبي ليها صدمة عمرها، لما فارق كريم الحياة فجأة في حادثة أليمة. ذهب وسابها لوحدها في الدنيا، ضعيفة ومكسورة، لأن كريم كان بالنسبة لها السقف اللي حاميها والأمان اللي عايشة فيه.
وبعد ما انتهت شهور عدتها، جات حماتها “هنيه” -اللي هي أم كريم وأدهم- وطلبت منها الطلب الصعب: إنه لازم تتجوز ابنها التاني “أدهم”. سارة رفضت وصصرخت وعارضت بكل ما فيها من قوة، ازاي تتجوز أخو حبيبها؟! بس صدمتها الحقيقية كانت لما حماتها هددتها بشكل مباشر وغير مباشر إنها هتاخد منها الطفلين حازم وحمزة لو رفضت الجواز من أدهم. سارة ما استحملتش الفكرة، تتكوي بفرقة جوزها وكمان تتحرم من عيالها؟! وافقت وسلّمت أمرها لله من أجل صغارها فقط.
ليلة الجواز، كانت صريحة جداً مع أدهم، حطت كل النقاط على الحروف وقالتله ببرود: «اعرف إن كريم هيكون أول وآخر راجل في حياتي ودمي وفي قلبي.. لو انت عايز زوجة بجد وبناء أسرة، دور على غيري، لكن أنا مجرد جثة عايشة عشان الولاد، مش أكتر.»
*** باك من الفلاش باك ***
فاقت سارة من شرودها وذكرياتها المؤلمة على صوت خبط متواصل على الباب. مسحت دموعها بسرعة وراحت تفتح، كانت حماتها “هنيه”. هنيه دي كانت بمثابة أمها التانية؛ طول عمرها حنونة معاها ومراعية ظروفها، بس المعاملة اتغيرت بشكل ملحوظ بعد وفاة كريم، وبقت بتبصلها بنظرات عتاب وقسوة.
دخلت هنيه وبصت لسارة بصوت هادي بس مليان غضب مكتوم:
«سارة.. مش شايفه إنك طولتي أوي؟ أربع شهور كتير يا بنتي! مفيش راجل في الدنيا يستحمل الدلع والصد ده كله!»
سارة بصتلها بصدمة ونطقت بالعافية:
«دلع؟! انتِ شايفه إن اللي أنا فيه ده دلع يا أمي؟!»
هنيه بنبرة فيها حدة:
«أيوه دلع! عايزاه يعمل إيه تاني يعني؟ الراجل ساكت وصابر وشايل عيال أخوه وموفرلك كل حاجة، وانتِ قافلة الباب في وشه!»
سارة صرخت بصوت مخنوق والدموع مغرقة وشها:
«مش عايزة منه غير إنه يبعد عني! هو لو كان رفض من الأول وما وافقش على الجوازة دي مكنش حصل كل ده! أنا مش قادرة أتقبله!»
أخدت هنيه نفس عميق وقربت منها بنبرة حانية:
«يا بنتي ده قدرك ونك ونكفك.. انتِ لسه صغيرة، عندك 26 سنة، وعيالك محتاجين أب يحميهم ويكبروا في وسط عيلة. انتِ عمرك ما هتقدري تعوضيهم عن أبوهم لوحدك، وأدهم مفيش أحن منه عليهم وعلى عيال أخوه.»
سارة بكيت بحرقة ورمت نفسها في حضنها:
«مش قادرة أتقبل أو أتخيل راجل تاني غير كريم جنبي في أوضة واحدة! أنا وافقت على أدهم عشانك وعشان الولاد.. عارفة إني لو خدت ولادي ورحت في مكان تاني كنتِ هتحسي وقتها بموت ابنك كريم تاني، بس أكتر من كده مش قادرة أقدم.. والله العظيم ما قادرة!»
