شجن دايمًا كانت بتضايقها بكلامها، لكن الموقف ده خلّى مشاعر غرام تتلخبط.
حست إن فهد كبر في نظرها.
صحيت من أفكارها على صوت فهد وهو بيقول بحنية:
— اطلعي يا غرام.
كانت عايزة تتخانق معاه علشان طريقته، لكن لسانها اتربط ومقدرتش ترد.
ليه بتتلخبط قدامه أحيانًا، مع إنها مش من طبعها؟
يمكن تكون بدأت تقع في حبه فعلًا!
طلعت غرام بيتها وقلبها بيدق بسرعة، ودخلت أوضتها وحطت إيديها على قلبها.
غرام:
— لا، متدقش كده! إحنا مننفعش. أوعى تحبه!
لكنها رجعت سألت نفسها:
— طب ليه لأ؟
في بيت فهد
دخل فهد وندى البيت، ولقوا والدتهم بتحضر الأكل.
ابتسم فهد وقال:
— عرفتي منين إننا جايين دلوقتي؟
هدى بمكر:
— من صوتك اللي كان مسمع آخر الشارع، علشان ست غرام!
قعد فهد على الكرسي وقال بتعب:
— ويا ريت كل ده نافع يا أمي. أنا بحاول أقنعها إني بحبها، وهي لسه مصممة تبعد.
ابتسمت هدى؛ لأنها بتحب غرام زي بنتها.
من أول ما غرام سكنت في العمارة، كانت هدى دايمًا تدعي:
— ربنا يجعلك من نصيب فهد يا بنت نور.
هدى:
— ربنا يريح قلبك يا حبيبي، وأشوفك أجمل عريس إنت وهي، وأشيل عيالكم يا رب.
قبل فهد إيد والدته وقال:
— ربنا يخليكي ليا يا أمي. كتري من الدعاء ده، علشان أنا صبري بدأ يقل.
موقف جديد بين غرام وفهد
في بيت غرام، سمعت غرام صوت مامتها.
نور:
— يا غرام، اطلعي قولي لخالتك أم فهد إن المقاسات مش مظبوطة وفيها لخبطة.
غرام باستغراب:
— مقاسات إيه؟
نور بقلة صبر:
— يا غرام، بلاش أسئلة دلوقتي. اطلعي قولي لها وخلاص.
لبست غرام إسدالها الأسود، وطلعت تخبط على الباب.
اتفتح الباب، وفجأة صرخت غرام ولفت وشها للناحية التانية.
فهد بمكر:
— إيه؟ أول مرة تشوفي حد؟
غرام بضيق:
— ادخل، البس حاجة مناسبة!
غرام بعصبية:
— فهد، أرجوك ادخل البس تيشيرت. مينفعش كده!
لاحظ فهد إحراجها، فقفل الباب شوية علشان يديها فرصة تهدى.
غرام بعصبية:
— واحد قليل الذوق، محتاج يتعلم الأدب!
فتح فهد الباب تاني، وكان لابس تيشيرت أسود وبنطلون أسود.
فهد:
— مين ده اللي محتاج يتعلم الأدب يا شبر ونص؟
غرام بنرفزة:
— بس يا أبو طويلة!
فهد:
— ليه كده يا حبي؟ ده البنات دلوقتي بيتمنوا الطول ده، متبقيش مش مقدرة النعمة!
غرام:
— فهد، ابعد بقى!
فهد بحب:
— ارفعي وشك خليني أشوف عيونك الحلوة.
بصت غرام للأرض بكسوف.
غرام:
— بطل رخامة وابعد. عيب حد يشوفنا!
فهد:
— محدش موجود هنا تقريبًا، أنا بس كنت عايز أتكلم معاكي براحة.
فركت غرام إيديها بتوتر وقالت:
— لو سمحت يا فهد.
فهد بمرح:
— يا لهوي على فهد وسنين فهد! الواحد مش عارف يعمل إيه علشان الجميل ترضى عنه!
غرام بصدمة:
— مالك؟
فهد:
— مالي؟ اقعدي قولي اللي إنتِ عايزاه وسيبيني أتكلم معاكي.
غرام بعصبية:
— فهد، بطل كلامك ده وسيبني أمشي.
قرب منها فهد وقال:
— طب ولما تمشي، فهد هيعمل إيه؟ إنتِ شاغلة بالي طول الوقت!
زقت غرام فهد بسرعة لما شافت هدى جاية ناحية الباب.
هدى بهدوء:
— بتعملوا إيه يا حبايبي؟
فهد بتوتر:
— كنت بشرح لها حاجة، قصدي… كنا بنتكلم يا ماما!
ضحكت غرام وهدى على توتره.
غرام بحب:
— ماما، عايزاكي يا طنط.
هدى:
— حاضر يا حبيبتي، اطلعي وأنا هحصلك.
طلعت غرام السلم، ورجعت تاني وقالت وهي بتشاور على فهد:
— آه صح يا طنط، متنسيش تربي ابنك!
خوف غرام من الظلام
فجأة، النور قطع في العمارة.
غرام بخوف:
— فهد، أنا خايفة!
قرب منها فهد واحتضنها علشان يطمنها.
فهد بحنية:
— متخافيش يا حبيبتي، أنا معاكي. هتطلع ندى ومعاها كشاف.
غرام ببكاء:
— فهد، متسبنيش.
فهد:
— هو حد يسيب روحه؟ يا ريتك تحسي بيا، أنا تعبت من المحاولة معاكي، وإنتِ عنيدة جدًا.
قبل ما يكمل كلامه، النور رجع.
بعدت غرام عنه بكسوف، واستوعبت إنها كانت في حضنه، فبعدت بسرعة وجريت على بيتهم.
فهد باستغراب:
— البنت دي غريبة أوي!
وبعدين ابتسم وقال:
— بس قلبي معاها.
دخلت غرام بيتهم وجريت على أوضتها، ومردتش على مامتها وهي بتناديها.
رمت نفسها على السرير وقالت بعصبية من نفسها:
— كان لازم تحضنيه؟! ما كنتِ مسكتي السلم أو الحيطة!
رجعت كلمت نفسها:
— هو أنا عندي جفاف عاطفي علشان أعمل كده؟ بس حضنه كان مريح أوي!
وفجأة سمعت صوت فهد من بره، وهو بيتكلم بصوت عالي علشان يوصل لها:
— بتصوتي ليه يا غرام؟ ده أنا بقيت بكلم نفسي من كتر التفكير فيكي! بس بحبك والله. حني علينا شوية، نفسي نبقى لبعض ونعيش مبسوطين!
ضحكت غرام من قلبها على كلام فهد المرح.
فهد عمومًا مش مرح مع أي حد، لكنه معاها بيقدر يتخلى عن جزء كبير من عصبيته؛ لأنه عارف إنها بتحب الشخصيات المرحة.
غرام بالنسبة لفهد مش مجرد واحدة بيحبها، دي بقت أغلى إنسانة في حياته.
أزمة في محلات فهد
في صباح اليوم التالي، كان فهد قاعد في مكتبه وبيتكلم في التليفون بعصبية.
فهد:
— يعني إيه البضاعة تتسرق؟ عايز تقنعني إنها اختفت من غير ما حد يعرف؟ لو معرفتش مين المسؤول عن اللي حصل، هتكون في مشكلة كبيرة!
قفل التليفون بعصبية ونادى:
— إياد!
دخل إياد وهو قلقان من حالته.
إياد:
— نعم يا فهد؟
فهد:
— دلوقتي حالًا تعرفلي مين المسؤول عن اختفاء البضاعة اللي كانت جاية في الطريق. قدامك 24 ساعة، ولازم أعرف الحقيقة!
خرج إياد بسرعة؛ لأنه عارف إن فهد وقت الضغط بيكون عصبي جدًا.
قعد فهد على الكرسي ورجع رأسه بتعب، وحط إيده على رأسه.
فهد:
— مش عارف أتصرف إزاي. يا رب سهّل.
رجوع غرام المتأخر
في المساء، رجعت غرام هي ومامتها حوالي الساعة اتناشر بالليل.
طلعت على السلم، ولقت فهد واقف قدامها.
فهد بعصبية:
— كنتي فين كل ده؟
غرام بعدم فهم:
— وإنت بتسألني ليه؟
فهد:
— مترديش السؤال بسؤال يا غرام. اتأخرتي بره ليه؟
غرام بعصبية:
— وأنا مالي؟ أتأخر براحتي. فهد، متنساش نفسك. إنت مش جوزي ولا أخويا، إنت صاحب العمارة اللي إحنا ساكنين فيها وبس، وأخو صاحبتي.
نور:
— خلاص يا غرام، اهدي.
نور لفهد:
— يا حبيبي، غرام كانت معايا. كنا بنجيب حاجات ورجعنا متأخر.
عض فهد على شفايفه بغيظ وقال:
— ماشي يا أمي، ماشي.
دخلت نور بيتها وسابت غرام وفهد بره.
غرام بنرفزة:
— كاتم عصبيتك ليه؟ طلعها!
قرب منها فهد وقال بضيق:
— إنتِ مستفزة كده ليه؟ بجد أنا مشفتش حد مستفز زيك!
غرام بعصبية:
— أهو إنت كمان!
غيرة غرام
في يوم تاني، اتفقت ندى وغرام إن غرام تيجي تذاكر عندها علشان الامتحانات، وأكدت غرام عليها إن فهد ميكونش موجود.
اتكلمت ندى وقالت:
— غرام، أنا جعانة. ما تيجي نعمل أكل؟
غرام:
— نعمل إيه؟
ندى:
— مكرونة بشاميل! أنا بحبها، وماما ومامتك غالبًا قاعدين فوق بيتكلموا.
غرام بابتسامة:
— بطلي الظن الوحش بتاعك.
ندى بضحكة:
— ظن وحش؟ والنبي إنتِ كيوت!
دخلت غرام المطبخ وبدأت تحضر الأكل مع ندى. خلصوا وأكلوا، وبعدها رجعوا يكملوا مذاكرة.
اتفتح باب الشقة.
فهد:
— يا ندى!
ندى:
— تعالى، أنا هنا في الصالون.
دخل فهد، ولما شاف غرام، قعد على الكنبة اللي قصادها وحط رجل على رجل.
فهد بمكر:
— لو كنت أعرف إن الجميل هنا، كنت سيبت الدنيا كلها وجيت قعدت معاها. أصل هنا في حاجة حلوة مشفتهاش في حياتي!
غرام بسخرية:
— لا يا شيخ!
فهد:
— أيوه والله يا قلب الشيخ!
ندى بمرح:
— لولا وجودي، مكنتش شفتها في بيتنا أصلًا!
رما فهد عليها الوسادة وقال:
— على النعمة، أوقات بقول خسارة فيكي الفلوس اللي دفعناها في المدارس الخاصة!
وبص لغرام وكمل بمرح:
— أهي غرام دخلت مدرسة حكومي، وشوفي الرقة والجمال والهدوء!
غرام بعصبية:
— إنت متعرفش تقعد من غير كلامك المستفز ده؟
فهد بحب:
— ميعرفش الجميل إن ده مش طبعي، بس كله علشان أتكلم معاكي وأشوفك بتضحكي. بحبك وإنتِ عصبية يا حلوة!
رمت غرام عليه مخدة الكنبة ومشيت.
ضحك فهد وهو بيتابعها بعينيه.
حديث فهد عن داليا
قبل ما غرام تخرج، سمعت فهد بيقول لندى:
— بنت عمتك دي مش ناوية تهدى؟ داليا عملت مشكلة، وعمتك جت المحل وعايزاني أساعدها وأروح معاها مناسبة علشان تصلح اللي حصل.
ندى:
— طب وإنت مالك بكل ده؟
فهد:
— عمتك صعبت عليا. جت وقعدت تحكيلي اللي حصل، ومتنسيش إن عمتك ملهاش غيري. ومهما كان، دي وصية بابا الله يرحمه.
سمعت غرام الكلام وخرجت بعصبية.
ضحك فهد لما شافها، لأنه مبيقدرش يفضل متضايق وهي قدامه.
جريت عليها ندى وقالت:
— رايحة فين؟
غرام بعصبية:
— همشي!
فهد:
— اسمها همشي، مش بالطريقة دي!
غرام:
— أنا حرة، وموجهتلكش كلام!
قام فهد ووقف قدامها.
فهد:
— غرام، اتكلمي بهدوء.
غرام:
— حد قالك إني بتكلم بطريقة غلط؟
فهد:
— ندى، ادخلي جوه شوية.
دخلت ندى، وبصت غرام لفهد بقلق؛ لأنها عارفة إنه ساعات بيكون عصبي، لكنها كانت عايزة تفهم مشاعره.
فهد بحنية:
— إيه اللي مضايقك؟ دخلتي تجيبي حاجتك وإنتِ كويسة، ولما خرجتي بقيتي متضايقة.
غرام بتوتر:
— فهد، اللي إحنا بنعمله ده ممكن يكون غلط.
فهد بتعب:
— وفكرك إني مبسوط وأنا شايفك خايفة ومش عارفة تاخدي قرارك؟ أنا بطلب منك فرصة نجرب، ولو إنتِ مش متأكدة من مشاعرك، خدي وقتك.
غرام فضلت ساكتة.
فهد كمل:
— تخيلي حاجة بتحبيها وقدامك، لكن مش عارف تقرب منها ولا تقضي وقت معاها. ده إحساسي كل يوم، بس أنا مش عايز أضغط عليكي.
غرام بخجل:
— فهد، كفاية كلام!
فهد بابتسامة:
— حاضر يا عيون فهد.
بصت للأرض بكسوف، فرفع فهد رأسه برفق وسألها:
— إيه اللي مضايقك بجد؟
غرام بتلقائية:
— إيه علاقتك بداليا؟
فهد بمكر:
— وإنتِ مالك ومال داليا؟
غرام بعصبية:
— خلاص، اعمل اللي إنت عايزه!
فهد بحب:
— لا داليا ولا غيرها يقدروا ياخدوا مكانك عندي. أنا محبتش ولا هحب غيرك. وحتى لو محصلش نصيب واتجوزنا، هتفضلي غالية عندي.
أنا ساكت علشان عارف خوفك، ومش هضغط عليكي في أي حاجة. لكن نفسي تديني فرصة، ومتقرريش تبعدي عني من غير ما نفهم بعض.
بعدت غرام عنه بهدوء، ومقدرتش ترد. طلعت على بيتهم بسرعة، وهي مش عارفة تقول إيه.
فهد بص وراها وقال لنفسه:
— هحاول بكل الطرق أخليكي تفهمي قد إيه أنا بحبك، ويمكن في يوم تحسي بنفس اللي حاسه بيه.
في الثالثة صباحًا
بصت غرام لساعة التليفون، لقت الساعة قربت من تلاتة الفجر. وكل شوية كانت تبص من البلكونة، لكنها مش بتلاقي عربية فهد.
كانت غيرانة بعد ما عرفت إنه خرج مع داليا، ومش فاهمة ليه الموضوع شاغل بالها بالشكل ده.
فهد طول عمره بيحاول يرضيها، وهي كانت دايمًا بتبعد عنه وتقول إنها مش بتحبه، رغم إنها بدأت تكتشف إن مشاعرها ناحيته مختلفة.
كانت واثقة إنه مبيفكرش في غيرها، لأنه من وقت ما سكنت في العمارة ملاحظتش إنه اهتم بأي بنت بالطريقة اللي بيهتم بيها.
سمعت صوت عربية، فبصت من البلكونة وقفلت النور علشان متبانش.
شافت فهد وهو بينزل من العربية، وكان حاطط إيده على جنبه وبيسند على العربية.
في الأول افتكرت إنه تعبان، لكن لما لاحظت طريقته في المشي، قلقت جدًا.
نزلت بسرعة وهي لابسة البيجامة وشعرها سايب.
لقته ماشي وبيسند على الحيطة.
غرام بخوف:
— فهد!
فهد بصوت ضعيف:
— ششش، متعليش صوتك.
قربت غرام منه ووقفت قدامه.
غرام بقلق:
— فهد، إنت كويس؟
حاول يخفي تعبه لما شاف الخوف في عينيها، وقال:
— أنا كويس يا غرام، مجرد إصابة بسيطة، وهبقى كويس.
