زينة الضواحي – الحكاية كاملة
الجزء الأول: ليلة اتغيرت فيها الأقدار
قالت زينة بوجع وعتاب:
«من حقي أعرف، اتجوزتني ليه؟ وليه غيرت رأيك وكتبت عليَّ بدل أختي؟ وكرهتها فيَّ؟ انطق يا مهران!»
مهران ضحك بسخرية وهو بيخلع جلابيته وقال:
«حلوة كرهت أختك فيَّ دي! قال يعني قبل سابق كنتوا سمن على عسل! دي سواء هي ولا أمها مش طايقينك.»
قالت زينة بغضب شديد:
«مكناش سمن على عسل، وأنا عارفة إنهم مش بيحبوني قوي، بس مكناش بنأذي بعض. كيف قدام الخلق يوم كتب كتابها تقول أنا عايز أختها ومش عايزها هي؟ اشحال ما كنا ولاد عم ومتربيين في بيت واحد! دلوقتي جاي تفتكر إنك عايزني أنا مش فاطمة ليه؟ إيه اللي عملتهولك علشان تكسفها وتحرجها بالشكل ده؟»
مهران رد بلامبالاة:
«مزاجي! من غير سبب، هفت في دماغي كده.»
قالت بذهول:
«مزاجك؟ ومزاجك ده ما قالكش إننا بنات عمك وإن عيب اللي حصل ده؟ ما قالكش إن أختي هتكرهني؟ ما قالكش إني مخطوبة لغيرك ورايدة خطيبي؟»
مهران قاطعها بغضب:
«بقولك إيه، أنا دماغي وجعاني من الرزع والزمر وصوت الرصاص. كفاية حديت ما هيقدمش ولا يأخر. إحنا اتجوزنا خلاص، اقفلي على السيرة دي وافرحي بحالك. الليلة ليلتك يا عروسة، ومش مع أي حد، ده مع كبير الضواحي كلها وزينة رجالها. يلا استهدي بالله وارمي ورا ضهرك.»
قال كده ودخل الحمام، وهي حطت إيدها على راسها بصداع وذهول وقالت بدموع:
«يا ترى عاملة إيه دلوقتي يا فاطمة؟ يا مرّك يا زينة، يا حظك الصعب!»
في أوضة تانية، كانت فاطمة قاعدة والغضب مالي عينيها، وحواليها حاجات كتير متبعترة من شدة انفعالها.
دخلت أمها، وهي ست في الأربعينات، وقالت بحزن:
«هدي نفسك يا فاطمة، ما تعمليش في روحك كده يا بنتي.»
فاطمة بصتلها بذهول وغضب وقالت:
«ما أعملش في روحي كده؟ أمال أعمل إيه يا أما؟ أعمل إيه؟ بعد ما خلاص، خلاص كنت هتجوزه ونولت مرادي، يعمل فيَّ كده قدام الخلق! وأبوه، أبوه ما صدق، حتى ما قالوش عيب، وكتب كتابهم! زي ما تكون هي بنت أخوه وأنا لأ! طب ليه؟ ليه عملوا فيَّ كده؟ ما أنا لو كان أبويا عايش، ما كانش سمح إني أتهان بالشكل ده.»
أمها قالت بدموع:
«اهدي يا فاطمة يا بنتي، هتجرالك حاجة.»
فاطمة ردت بغضب وصدمة:
«ما جرالي خلاص يا أما! اتهنت واتحرجت قدام الناس، لكن مش هعديهالهم، هما الاتنين، خصوصًا اللي خطفته مني في ليلة فرحي. مش هسكت أبدًا!»
وخرجت من الأوضة بعصبية، وأمها جريت وراها بخوف. دخلت فاطمة أوضة مقفولة وبدأت تدور في الأدراج، وأمها بتقول:
«بتعملي إيه يا فاطمة؟ عايزة إيه من أوضة أبوكي يا بنتي؟ اعقلي وخلينا نتكلم.»
في الوقت ده، كان مهران بيتكلم مع الدكتور وقال:
«شكرًا يا دكتور، بارك الله فيك، أنا هتصرف في الباقي. معلش هتعبك يا أبوي، توصل الدكتور لداره.»
الدكتور اتنهد ومشي مع والده.
بعد شوية، أبوه رجع عند مهران وقال:
«فاطمة هي اللي عملت كده، أنا شفت الحاجة في إيدها.»
مهران قال بغضب شديد:
«ومين غيرها؟ بس مش هعديها لها. خليني أطمن عليها الأول، وليها تصرف.»
أبوه اتنهد وقال:
«ادخل إنت لمرتك دلوقتي، وكل حاجة هتتحل.»
مهران هز راسه بالموافقة ودخل عند زينة، اللي كانت لسه نايمة. قعد جنبها على السرير وبصلها بحزن وقال:
«حقك على راسي يا بنت عمي، أنا السبب في اللي حصل لك ده.»
وبعدين كمل بغضب:
«بس مش هسيب حقك، وهتشوفي بعينك.»
فضل جنبها لنص الليل، لحد ما بدأت تستعيد وعيها. فتحت عينيها ببطء وقالت بتعب:
«آه…»
مهران بص لها بلهفة وقال:
«زينة، سامعاني يا بنت عمي؟»
زينة هزت راسها بتعب وقالت بدموع:
«واعي للي عملته؟ واعي إن أختي كرهتني كيف؟»
مهران اتنهد بحزن وقال:
«هي عمرها ما حبتك يا زينة، وإلا ما كنتيش تهوني عليها كده.»
زينة بصت له بدموع وغضب، وحطت إيدها على كتفها المصاب وقالت:
«إنت مش حاسس بأي ذنب؟ عادي كده؟ بسببك أختي تصرفت بالشكل ده، وكل ده من تحت راسك!»
مهران اتنهد بارتياح لما شاف إنها بدأت تتكلم، ووقف عند الشباك وقال:
«مدام اتكلمتي، تبقي اتحسنتي. ألف سلامة عليكي.»
زينة حاولت تقف بالعافية وقالت بغضب:
«إنت كيف بارد كده؟ إنت مش شوفت بعينك إن فاطمة كانت عايزة تأذيني؟»
قاطعها بسرعة:
«عارف وشوفت، ومش هعديها. أنا عارف كيف أخليها تندم على اللي عملته.»
زينة قالت بذهول وخوف:
«إياك تعمل لها حاجة، أنا بقول لك أهو! دي أختي وأنا مسامحاها.»
مهران رمى السيجارة وداس عليها برجله وبصلها بغضب:
«إنتِ كيف طيبة زيادة عن اللزوم كده؟ دي كانت ممكن تأذيكي أذى كبير! أخت إيه وكلام إيه؟»
زينة ردت بدموع:
«إحنا اللي وصلناها لكده، أو بمعنى أصح حضرتك.»
ولسه هتمشي، شدها من دراعها ناحيته بقوة، ونسي إن دراعها مصاب.
زينة صرخت من الألم، فسابها بسرعة وسندها بإيده وقال بتوتر:
«أنا… أنا ما خدتش بالي. حقك عليَّ، ما خدتش بالي خالص، نسيت والله.»
زينة بصت له بدموع، وبعدت من بين إيديه وراحت نامت على السرير بتعب.
مهران اتنهد بحزن وغضب من نفسه، وراح جاب لها لبس نوم مريح من الدولاب، وقعد جنبها وقال:
«يلا علشان أساعدك تغيري الفستان ده، كله اتوسخ ومش هينفع تنامي بيه.»
زينة بصت له بطرف عينها وقالت:
«ملكش صالح بيا.»
مهران قرب منها وقال:
«أنا بساعدك علشان ظروفك يا زينة. يلا، مش هينفع تنامي بالفستان ده، ومتخلينيش أتعصب وإنتِ عارفاني.»
زينة خافت منه وقالت بدموع:
«أعمل لك إيه يعني؟ أنا مش هعرف أغير دلوقتي، دراعي واجعني قوي.»
مهران ضحك وقرب منها وقال:
«وأنا روحت فين عاد؟»
وبدأ يساعدها بهدوء، مع مراعاة دراعها المصاب، لحد ما قدرت تلبس لبسها المريح.
زينة كانت متوترة من قربه، وقلبها بيدق بسرعة.
مهران ابتسم وقال بهمس:
«اهدي، قلبك هيطلع من بين ضلوعك! في إيه؟ ده إحنا بنساعدك تغيري الفستان، أمال لما تبقي أحسن هتعملي إيه؟»
زينة اتسعت عينيها بصدمة، وبعدته عنها شوية وقالت:
«هو إنت هتساعدني في إيه تاني؟ الفستان بس اللي اتوسخ!»
مهران ضحك على خوفها وقال:
«أنا ما بتكلمش عن دلوقتي، أنا بتكلم عن لما دراعك يخف.»
زينة اتنهدت بارتياح وقالت بسرعة:
«لما يخف بقى، هو مش هيخف دلوقتي!»
مهران ضحك وقال:
«ماشي، أنا هبقى أشوف الموضوع ده. أنا مستنيكي، هتروحي مني فين؟»
وبعد شوية، بص لها بإعجاب وقال:
«يلا، كده بقيتي مرتاحة؟»
زينة قالت بتوتر:
«يلا هات الهدوم بقى وخلّصني.»
مهران ابتسم وقال:
«هدوم إيه؟ إنتِ جميلة قوي كده يا زينة.»
زينة قالت بتوتر:
«لأ، أنا بردانة، هات الهدوم.»
مهران ضحك بخفة، وساعدها تلبس البيجامة من غير ما يضغط على دراعها المصاب، وبعدها نيمها برفق على السرير وقال:
«كده تقدري تنامي.»
زينة اتنهدت بارتياح وقالت:
«الحمد لله.»
مهران ابتسم ابتسامة جانبية ومدد على السرير وقال:
«يمكن إنتِ اللي مش عاجبك كمان، وصدقتي ما خلصتي! بعد ما تعبتيني على ما ساعدتك.»
زينة قالت بغيظ:
«محدش قالك تساعد. كنت ناديت واحدة من الخدم طالما هتتعب، لأن الموضوع مطول.»
مهران ضحك وهز راسه بيأس وقال:
«من زمان قوي وأنا بسأل نفسي سؤال واحد يا زينة… هو مش المفروض ربنا حاطط لكل بني آدم عقل؟»
زينة هزت راسها بالموافقة باستغراب، فقال بسرعة:
«إنتِ بقى فين العقل اللي حطهولك؟ عمري ما شوفتك بتشغليه، ولا بتتصرفي بيه، ولا حتى بتفكيه وتزيتيه، لأحسن يصدّي!»
زينة قالت بغيظ:
«لأ، أنا بفهم كويس على فكرة. وبعدين إيه اللي أنا قلته علشان تقول إني مش بفهم؟»
مهران قال:
«هو أنا لما أقول لك تعبتيني، أبقى قصدي إني عملت مجهود على ما ساعدتك؟ حاجة صعبة دي يعني ومحتاجة أجيب لها الخدم؟»
زينة قالت باستغراب:
«إنت اللي بتقول إنك تعبت، فبقول لك نشوف واحدة من الخدم ولا اتنين.»
مهران هز راسه بيأس، وشاف إن التلميحات مش جايبة نتيجة، فقرب منها وقال بهمس:
«أنا قصدي إنك تعبتيني من كتر ما إنتِ شاغلة تفكيري وجمالك لفت نظري. يااه، يا زينة!»
بص لوشها، لقاها فاتحة عينيها على آخرهما وبتبص قدامها بارتباك، وعاملة نفسها مش فاهمة حاجة.
قالت بتوتر:
«أنا… أنا هنام. تصبح على خير.»
مهران ضحك على شكلها ونام جنبها على السرير، وشدها لحضنه بحنان.
زينة قالت بتوتر:
«سيبني يا مهران، فيه إيه؟»
مهران قرب منها وقال:
«ما فيش، بس ده أوامر الدكتور، قال لي أطمن عليها وأفضل جنبها.»
زينة اتنهدت بضيق، وحاولت تنام، وهو فضل جنبها لحد ما راح في النوم.
زينة فضلت تبص له باستغراب وتتأمل ملامحه، ومستغربة ليه عمل كل ده. فضلت وسط أفكارها لحد ما نامت هي كمان.
