ما قدرتش أسمع هي قالت إيه، بس شفت وش سليم وهو بيتحول وبيقلب دم.
— أنتِ فين؟
ودار ببطء ناحية الأسانسير.
أبواب الأسانسير اتفتحت، وخرجت منها شاهيناز..
كعب عالي أسود، بالطو بيج، وشنطة ماركة تقيلة.. كانت طالعة كأنها رايحة سهرة في مكان شيك، مش زايارة لطقلة في مستشفى الساعة 3 الفجر!
أول ما شافتني اتسمرت مكانها، وبعدين ابتسمت بخبث:
— ياه.. رجعتي تاني؟
سليم قرب منها بخطوات تقيلة:
— أنتِ دخلتي أوضة دنيا؟
شاهيناز عينيها ما ترمشوش:
— مين قالك الكلام ده؟
— أجيبي على سؤالي!
— سليم، أنت شكلان وتعبان ومش في وعيك..
— أجيبي!
الابتسامة اختفت من وشها تماماً:
— ما أعرفش أنت بتتكلم عن إيه.
رفع التليفون في وشها:
— الفيديو معايا.
ولأول مرة أشوف الخوف في عينيها.. بس الخوف ده ما قعدش غير ثانية واحدة، وحل محله التحدي والشر.
شاهيناز فتحت شنطتها ببطء، وطلعت علبة قطيفة صغيرة.. فتحتها، وكان جواها الغويشة الألماظ.
— بتدور على دي؟
سليم بص للعلبة:
— أنتِ قلتي إنها ضاعت!
— عشان كانت ضايعة فعلاً..
لفت شاهيناز ناحيتي وبصتلي بمنتهى القسوة:
— لحد ما لقيتها في المكان الصح!
جسمي قشعر:
— تقصدي إيه بالكلام ده؟
قفلت العلبة وشالتها في الشنطة تاني:
— أقصد إن ست دنيا بتاعتك دي لازم تفكر ألف مرة قبل ما تعيش دور الضحية والبريئة!
سليم قرب منها خطوة:
— شاهيناز!
شالت إيدها في وشه:
— لا.. دلوقتي أنت اللي هتسمعني!
قربت منه أوي لدرجة إن ريحة برفانها ملأت الطرقة:
— لو رجعت الست دي بيتك تاني، بكره الصبح أكون عاملاها محضر سرقة في النيابة!
وبصتلي في عيني مباشرة:
— ومعايا صور للغويشة وهي جوة شنطة هدومها!
الجزء الثالث
سليم ما زعقش.. وده أكتر إحساس رعب شاهيناز في اللحظة دي.
طلع تليفونه وطلب رقم:
— عم حلمي..
شاهيناز حاولت تتصنع الثبات:
— بتعمل إيه؟
— عاوز تسجيل كاميرات الفيلا كاملاً بتاع يوم الثلاثاء.
ربعت إيدها:
— الفيديو ده مش بيثبت حاجة!
— وعاوز كمان تسجيل كاميرات البوابة الرئيسية والجراج.
وشها بدأ يصفر:
— سليم!
طنشها تماماً وكمل في التليفون:
— وقول لعمة دشرية ما تلمسش أي حاجة في أوضة دنيا ولا تقرب منها.
شاهيناز الضحكة هربت من وشها تماماً.. وأنا ساعتها فهمت إن سليم مش بيحاول يعرف هي كدبت ولا لا، ده كان بيحاول يعرف هي كدبت لحد فين!
رجعنا الأوضة، ريناد كانت نايمة.
قعدت جنبها.. ما كانش ليا أي رغبة إني أكون طرف في الحرب اللي بين سليم وشاهيناز، كل اللي كان يهمني إن البنت تكون بخير.
على الساعة 5:08 الصبح، عم حلمي وصل ومعه تابلت، وكانت طالعة معاه عمة دشرية.
— سليم بيه..
عمة دشرية بصت لشاهيناز بقلة حيلة قبل ما تتكلم:
— أنازم أقول لحضرتك على حاجة أمانة في رقبتي.
شاهيناز قربت منها بتحذير:
— أنتِ ما تقوليش أي حاجة!
عمة دشرية اتعدلت وقالت بثبات:
— لا هقول!
وبصت لسليم:
— من أسبوعين شفت الهانم شاهيناز بتبص في الدرج اللي حضرتك بتشيل فيه أوراق القصر والمستندات.
سليم استغرب:
— وما قلتيليش ليه يا عمة؟
— عشان هددتني.. قالي لو نطقت بحرف هتبلغ عني إني سرقت 80 ألف جنيه كاش من البيت.
شاهيناز ضحكت بصوت عالٍ ومستفز:
— ده كلام فارغ وهبل!
عم حلمي فتح التابلت وقال:
— مش فارغ أوي كده يا هانم..
شغل تسجيل كاميرة المطبخ والمدخل الخلفي.. الساعة 6:11 مساء الثلاثاء، شاهيناز ظهرت وهي واقفة قدام جزامة المدخل، طلعت الغويشة من شنطتها، وبدأت تصورها بالفاون.
وبعدها كاميرا الطرقة جابتها وهي داخلة أوضتي، وخرجت بعدها من غير الغويشة!
عم حلمي قال بثبات:
— الصور اللي مع الهانم للغويشة جوة شنطة دنيا اتأخدت بعد ما هي حطتها بنفسها هناك.
شاهيناز حاولت بوقاحة تقلل من الموضوع:
— وده برضه مش دليل إني رميتها في شنطتها!
عم حلمي حرك إصبعه على الشاشة:
— مظبوط.. بس ده اعتقد دليل كافي.
الصورة اللي بعد كده كانت من كاميرا صغيرة أنا عمري ما لاحظتها.. كانت متثبتة في الطرقة الفاصلة قدام المراية اللي بره أوضتي.
الكاميرا ما كانتش جايبة الأوضة من جوة، بس المراية كانت عكسة جزء من السرير وشنطتي.. وكان باين فيها بوضوح إيد شاهيناز وهي بترمى العلبة جوة الشنطة!
السكوت حل في المكان.. مفيش صوت طالع.
شاهيناز بصت للشاشة، وبعدين بصت لسليم:
— أنا ممكن أفهمك..
— اتفضلي، فهميني.
— أنا كنت بعملك ده عشان أحميك!
— بتحميني بانك تلبسي تهمة سرقة للدادة اللي مأمنها على بنتي؟!
شاهيناز خلعت الأقنعة كلها وقالت بغل:
— دنيا كانت بتدخل في عيلتك زيادة عن اللزوم! ريناد كانت بتعشقها، وأنت كنت بتبصلها، حتى الشغالين هنا كانوا بيعاملوها كأنها صاحبة بيت!
— لأنها أجدع وأحق بالبيت ده منك!
