لت لها: “يا بنتي هو غلط، بس إنتِ كمان اللي قولتيله تعالى، ليه كل اللي حصل ده؟ وليه الإيصالات والمبالغ دي؟ مش كفاية اللي عملتوه فيه؟”
بصت لي وضحكت وقالت: “عشان لما يحب ييجي تاني يفتكر إن الإقامة عندنا غالية!”
قلت لها: “اتقي ربنا، ده شاب ومستقبله ممكن يضيع.”
ردت بكل بجاحة: “ما تيجي إنتِ كمان يا طنط!”
أنا اتصدمت من ردها، ومشيت وأنا مش مصدقة إن فيه ناس ممكن توصل للدرجة دي.
لكن اللي حصل بعد كده كان أغرب.
بعد حوالي أسبوع، ابني رجع من بره وشه أصفر، ودخل أوضته وقفل الباب.
دخلت وراه وقلت له: “مالك يا حبيبي؟ حصل إيه تاني؟”
قال لي: “يا أمي، أنا مش هقدر أعيش كده، كل يوم تهديد وكل يوم حد يلمح لي بكلام، وأنا خايف الإيصالات دي تضيع مستقبلي.”
قلت له: “طب ما نروح لمحامي ونشوف نعمل إيه؟”
سكت شوية، وبعدها قال: “في حاجة أنا مخبيها عنك من يوم اللي حصل، وكنت خايف أقولك عليها.”
قلبي اتقبض وقلت له: “إيه يا ابني؟ فيه إيه تاني؟”
طلع موبايله وفتح محادثة قديمة بينه وبين البنت، ووراني رسالة كانت باعتاها له قبل ما يروح البيت بيومين.
قرأتها مرة واتنين، وحسيت إن رجلي مش شايلاني!
لكن الصدمة الأكبر إنه قال لي: “يا أمي، أنا مش الوحيد اللي اتطلب منه يروح البيت ده… وفيه واحد صاحبي حصل معاه نفس الموضوع، بس هو اكتشف حاجة إحنا ماكناش نعرفها.”
وقبل ما أسأله صاحبي اكتشف إيه، جرس الباب رن.
فتحت لقيت شاب واقف، أول ما شافني قال: “حضرتك أم أحمد؟ أنا لازم أتكلم معاكي، والموضوع يخص ابنك والبنت دي.”
دخلته، وأول ما قعد قال جملة خلتني أحس إن المصيبة أكبر بكتير من اللي كنت متخيلاه:
“أنا معايا دليل إن اللي حصل مع أحمد مش أول مرة… وإن أبو البنت مش هو اللي كان بيدبر كل حاجة!”
يا ترى مين الشخص اللي كان بيدبر الموضوع؟ وإيه الدليل اللي معاه؟ وليه اختار يتكلم بعد سبع شهور من اللي حصل؟
يتبع…
#حكاوي_شيمو
رأيكم يهمني: هل أحمد غلطته تستاهل كل اللي حصل له؟ وهل المفروض أمه تسكت خوفًا على مستقبل ابنها، ولا تواجه العيلة دي بالقانون مهما كانت العواقب؟
ومتنسوش تصلوا على النبي ﷺ
الجزء الأخير من حكاية ابني والبنت اللي نصبوا عليه…
الشاب اللي جه البيت قعد قدامي، وكان باين عليه التوتر، وابني أحمد أول ما شافه قام من مكانه وقال: “إنت إيه اللي جابك هنا يا كريم؟!”
بصيت لابني باستغراب وقلت: “إنت تعرفه؟”
كريم رد وقال: “أيوه يا طنط، وأنا واحد من الناس اللي اتضحك عليهم بنفس الطريقة، بس أنا سكت فترة طويلة عشان كنت خايف.”
قلت له: “يعني إيه بنفس الطريقة؟ احكيلي من الأول.”
قال: “أنا من حوالي سنة كنت بتكلم مع بنت من نفس العيلة، وفي يوم قالت لي إن أهلها مش موجودين، ولما روحت لقيت أبوها وإخواتها مستنييني، وعملوا معايا نفس اللي عملوه مع أحمد بالظبط. ضرب وتهديد وإيصالات بمبلغ كبير.”
أحمد بص له وقال: “طب وإنت عملت إيه؟”
رد كريم: “أنا مضيت زيك، لكن بعدها فضلت أدور على حل، ولما كلمت محامي قالي إن التوقيع لوحده مش معناه إنك خلاص ضعت، وإن فيه إجراءات قانونية نقدر نتحرك بيها.”
سألته: “طب إيه الدليل اللي معاك؟”
طلع موبايله وفتح تسجيل صوتي، وقال: “التسجيل ده مش للبنت، ده لواحد من إخواتها، كان بيتكلم مع واحد صاحبه وبيحكيله عن اللي حصل معايا.”
شغّل التسجيل، وسمعنا صوت بيقول: “إحنا مش أول مرة نعمل كده، والواد لما يخاف ويمضي خلاص، محدش بيقدر يفتح بقه بعد كده.”
حسيت إن الدم بيغلي في عروقي، لكن كريم كمل: “أنا مش عايز أظلم حد، وعشان كده أنا جاي أقولكم إن فيه كذا شاب حصل معاه نفس الموضوع، وكل واحد فيهم ساكت من
